हेटौँडा — बागमती प्रदेश सरकारले ७ वर्षयता मकवानपुर र चितवनका सीमान्तकृत चेपाङ, माझी र बोटे समुदायलाई ७०० भन्दाबढी घर बनाएर हस्तान्तरण गरिसकेको छ । 

जनता आवास कार्यक्रमअन्तर्गत आव ०७५/०७६ देखि हालसम्म मकवानपुर र चितवनका चेपाङ, माझी र बोटे समुदायलाई ७०७ वटा भवन हस्तान्तरण भइसकेको छ । ९०९ घरपरिवारसँग घर निर्माणका लागि  सम्झौता कार्यान्वयनको चरण अगाडि बढिसकेको सहरी विकास तथा भवन कार्यालय मकवानपुरका प्रमुख सीनियर डिभिजन ईन्जिनियर भुपेन्द्र यादवले बताए । जसमध्ये ८८४ परिवारले पहिलो र दोस्रो किस्ता, ८७० घरपरिवारले रकम बुझेर आवास भवन निर्माण गरिरहेका छन् । भवन निर्माण सम्पन्न भएपछि तेस्रो अर्थात अन्तिम किस्ता रकम दिने गरिएको  छ ।

स्थानीय सरकार अर्थात पालिकाको सिफारिस र छनोटलाई मूल आधार बनाएर प्रदेश सरकारले आवास गृह निर्माण प्रक्रिया अघि बढाउने गर्छ । आवास निर्माणमा हालसम्म ३८ करोड ४३ लाख रुपैयाँ खर्च गरिसकेको प्रदेश सरकारले प्रतिघर परिवार ४ लाख रुपैयाँ उपलब्ध गराउने गरेको छ । घरप्रतिको अपनत्व जागृत गराउन लाभग्राहीले श्रमदान लागतको १० प्रतिशत श्रमदान गर्नु जनता आवास कार्यक्रमको कार्यविधिमा व्यवस्था गरिएको छ । 

प्रदेश सरकारले सीमान्तकृत चेपाङ, वनकरिया, माझी, बोटेलगायत एकल महिलाका लागि आवास गृह निर्माण गर्दै आएको छ । ईन्जिनियर यादवका अनुसार सीमान्तकृत समुदायको अझै पनि शिक्षा, स्वास्थ्यप्रतिको चेतनास्तर कमजोर रहेको र बाल विवाह, कुरीति, अन्धविश्वासमा जकेडिएकाले राज्यको मूल धारमा ल्याउन आवास विकास कार्यक्रम सञ्चालन गरिएको हो । 

ईन्जिनियर यादवका अनुसार आर्थिक वर्ष २०७९/०८० मा प्रदेश सरकारले मकवानपुरमा २७९ र चितवनमा २२४ वटा घर निर्माण सम्पन्न गरी हस्तान्तरण समेत गरिसकेको छ । यसका लागि प्रदेश सरकारले २० करोड १२ लाख रुपैयाँ खर्च गरेको छ भने चालु आर्थिक वर्ष ९४ वटा घर निर्माण भइरहेको छ । थप १०५ घर निर्माण सम्पन्न गर्ने लक्ष्य लिएको छ ।

मनहरी गाउँपालिका मुसेधापमा रहेका लोपोन्मुख वनकरिया समुदाय जनता आवास कार्यक्रमवाट वर्षौदेखि वन्चित रहँदै आएका छन् । आफ्नो स्वामित्वमा एक धुर जमिन नभएको र अहिले छाप्रो बनाएर बसिरहेको जमिन पर्सा राष्ट्रिय निकुन्जभित्र पर्छ ।