चितवन — कयरखोलामा पैतला मात्रै डुब्ने पानी भएका कारण ओहोरदोहोर गर्न सहज छ । तर बर्खामा यो खोला ठूलो  बन्छ । चितवनको पहाडी भेग कालिका नगरपालिका–१० सिद्धिको तीन दोभानबाट कयरखोला तरेर घर छेरेबाङ गइरहेकी नमुना चेपाङ बर्खामा खोलाको सास्ती सम्झदा झसंग हुन्छिन् । उनकै आफन्तको यो खोलामा बगेर ज्यान गुमाएका छन् ।

२०८१ साउन १० मा साँझपख तीन दोभानबाट ३३ वर्षका गम्भीरबहादुर चेपाङ कयर खोला तर्दै थिए । उर्लेको बाढीले उनलाई बगायो । बगेको ठाउँभन्दा लगभग डेढ किलोमिटर तल उनको शव फेला पर्‍यो । गम्भीर नमुनाका फुपुका छोरा थिए । ‘यहाँ राम्रो पुल भएको भए दाइले अनाहकमा ज्यान गुमाउनु पर्दैन थियो होला,’ नमुनाले सुनाइन् ।

खोलाले बगाउने घटना बढ्न थालेपछि कालिका नगरपालिकाले तीन दोभानमा पुल बनाउन सुरु गर्‍यो । शनिबार उक्त पुलको ढलान थियो । ढलान हुँदै गर्दा पुल छेउमा उभिएकी नमुनाले थपिन्, ‘अब त्यस्तो नहोला ।’ उनले पछ्यौरीले बाँधेर ढाडमा बच्चा बोकेकी थिइन् । केहीबेर पुल हेरेपछि उनी उनी हतारिदै छिपछिपे खोला तरेर गाउँतिर लागिन् । 

नवीन प्रजा चेपाङ कयर तरेर  पाइमाराङस्थित घर जाँदै थिए । उनकी श्रीमती स्वस्तिका गर्भवती छन् । श्रीमतीको स्वास्थ्य परीक्षणका लागि उनी एक डेढ घण्टा हिँडेर सिद्धि तीन दोभान आउँछन् । बर्खामा खोला तर्दा मान्छे बगेको र ज्यानै गुमाएको घटना सम्झदा उनलाई डर नलाग्ने हैन । तर पुल बन्दै गरेका कारण अब त्यस्तो नहोला भन्ने आशामा छन् नवीन । ‘म यही तीन दोभानको मझवाङ माविमा पढेको हो । पढ्न आउँदा खोला बढेका बेला निकै सास्ती पाइयो । डोरी टाँगेर त्यसमा झुण्डेर पढ्न आउथ्यौं,’ नवीनले सुनाए । आफूहरुले तुइन तरेर वारपार गरे पनि अब यस्तो समस्या नहुने उनलाई लागेको छ ।

कालिका नगरपालिकाका मेयर विनोद रेग्मी संघीय र प्रदेश सरकारबाट बजेट नपाएपछि नगरपालिका आफैले पुल निर्माण सुरु गरेको बताए । ‘यहाँ वारपार गर्दा मान्छे नै मर्ने तर पुल बनाउन बजेट नहुने । हामीले पनि संघ या प्रदेशतिर आशा नगरेको हैन । बजेट नआएपछि आशा मात्रै गरेर बसेर त भएन । मान्छे बचाउन हामीले नै तत्परता बढयौं,’ मेयर रेग्मीले भने ।

नगरपालिकाका इन्जिनियर किशोर खतिवडाले संघीय बजेटबाट पुलको डिपिआर तयार भएको बताए । त्यसपछि गत वर्षको असारमा निर्माण कम्पनीसँग सम्झौता गरेर काम सुरु भएको हो । आउँदो पुस ३० भित्र निर्माणका सबै काम पूरा गर्नुपर्ने सम्झौता छ । ढलान भएका कारण ठूला गाडी नचले पनि आउँदो असारभित्र मान्छे तथा दुई पाङ्ग्रे/तीन पाङ्ग्रे गाडी ओहोरदोहोर गर्न मिल्ने उनले बताए । 

‘खोला किनारमा पर्खाल लगाउनेलगातका काम बर्खा अगाडि गर्न नसकिएला । बर्खा सकिए लगत्तै काम गरेर समयभन्दा अगाडि नै पुलको सबै काम पूरा गर्छाैं । अहिले ढलान भएको छ । बर्खामा पुल चालु गर्न सकिन्छ,’ इन्जिनियर खतिवडाले भने । पुलको लम्बाइ ४० मिटर छ ।

यसको निर्माण सम्झौता रकम ४ करोड ३८ लाख ६७ हजार ८५५ रुपैयाँ रहेको इन्जिनियर खतिवडाले बताए । सिद्धिको उत्तरी क्षेत्रका गाउँमा बस्ने १०/१२ हजार जनसंख्या यो पुलबाट लाभान्वित हुने कालिका नगरपालिकाकी उपमेर विमला लामाले बताइन् ।