चितवन — हिउँदभर रोकथामको कुनै काम नभएपछि पानी पर्न सुरु हुनेबित्तिकै तुइनखोलाको पहिरोले फेरि दुःख दिन सुरु गरेको छ ।

नारायणगढ–मुग्लिन सडकको मुग्लिन नजिक तुइनखोलामा पहिरो खस्दा शुक्रबार बिहानदेखि सडक दुईतर्फी नै अवरुद्ध भएको छ । विगतका वर्षहरूमा तुइनखोलाले निकै सताउने गरेको थियो ।

चितवन जिल्ला प्रहरी कार्यालयका प्रवक्ता डीएसपी रवीन्द्र खनालले बिहान ५ बजेर २० मिनेट जाँदा पहिरो खसेर बाटो अवरुद्ध भएको जानकारी दिए । दुईतर्फी रूपमा नै बन्द भएको सडक खुलाउन एक–डेढ घण्टा लाग्न सक्ने उनको भनाइ छ ।

राजधानी काठमाडौं र पर्यटकीय सहर पोखरालाई देशको पूर्वी र पश्चिमी भेगसँग जोड्ने मुख्य सडक हो नारायणगढ–मुग्लिन सडक । तर पहिरोले यो सडकमा निकै सास्ती दिने गरेको छ । यो सडक हुँदै दिनहुँ १२ हजारभन्दा धेरै साना–ठूला गाडी गुड्छन् ।