त्रिशूली — नुवाकोटको पञ्चकन्या गाउँपालिकाले बाँझो जग्गामा लगाएको चिया खेतीको व्यावसायिक उत्पादन सुरु भएको छ । 

गाउँपालिकाको वडा नं ४ स्थित घ्याङस्वारामा तीन वर्षअघि रोपेको चियामध्ये करिब १३ हजार बिरुवाबाट उत्पादन सुरु भएको गाउँपालिका अध्यक्ष तेजबहादुर तामाङले जानकारी दिए । उनका अनुसार पहिलो पटक पातको प्रशोधनमार्फत उत्पादन सुरु भएसँगै 'घ्याङस्वारा अर्गानिक चिया’को व्यावसायिक उत्पादन सुरु गरिएको छ ।

'ट्रेडमार्क, अनुज्ञापत्रसहितको कानुनी प्रक्रियाको चरणमा भएकाले बजार (उपभोक्ता) समक्ष पुर्‍याउन केही समय लाग्नेछ,' अध्यक्ष तामाङले भने, 'शतप्रतिशत अर्गानिक उत्पादित चियाको सम्बन्धित निकायमा गरिएको गुणस्तर परीक्षणको प्रारम्भिक नतिजामा अर्थोडक्स मध्येमा 'उत्कृष्ट’ रहेको नतिजा आएको छ ।'

तीन वर्षअघि पञ्चकन्या–४ स्थित घ्याङस्वाराको बाँझो रहेका तथा झारपातले ढाकिएका सार्वजनिक जग्गालाई कृषियोग्य बनाइ यहाँका जनप्रतिनिधि, कर्मचारी, शिक्षक, विद्यार्थीसहितको सयौं स्थानीयवासीको श्रमदानबाट रोपिएका चियाबाट उत्पादन सुरु भएसँगै गाउँपालिका उत्साहित भएको छ । पछिल्लो समय पालिकाकै अगुवाइमा निर्माण गरिएको घ्याङस्वारा सहिद स्मृति पर्यटकीय पार्क क्षेत्रको ३३२ रोपनीमा प्रधानमन्त्री रोजगार कार्यक्रमअन्तर्गत रोजगार सेवा केन्द्र पञ्चकन्याको समन्वयमा अहिले ८३ हजार बिरुवा उत्पादन दिन तयार भएको रोजगार संयोजक सरोजकुमार खातीले जानकारी दिए । उनका अनुसार अहिले १२ हजार ५० बिरुवाबाट टिपिएको पातलाई चिया तथा कफी विकास कार्यालय ककनीमा प्रशोधन गरिएको हो ।

परीक्षणका लागी १५ किलोग्राम पातको प्रशोधनमा तयारी चिया तीन किलो उत्पादन भएको छ । यसको गुणस्तर उच्च पहाडी एवं हिमाली क्षेत्रमा उत्पादन हुने अर्थोडक्स चियामा उत्कृष्ट रहेको उल्लेख छ । कानुनी प्रक्रिया पूरा भएसँगै 'घ्याङस्वारा अर्थोडक्स चिया’को व्यावसायिक उत्पादन, मूल्य निर्धारणपश्चात् बजार पठाइने रोजगार संयोजक खातीको भनाइ छ ।

'समुन्द्री सतहबाट एक हजार ८०० देखि दुई हजार २०० मिटर उचाइमा चियाको व्यावसायिक उत्पादनसँगसँगै स्थानीय किसानलाई अनुदानमा वितरण गर्न ८४ हजार बिरुवा तयार भएका छन्', उनले भने, 'यस क्षेत्रमा रोजगार सिर्जनामार्फत कृषिमा रूपान्तरण गर्दै पर्यटन प्रवर्द्धनमा जोड दिने उद्देश्यले सुरु गरिएको चिया खेतीको उत्पादनले घ्याङस्वारालाई छोटो अवधिमा नै परिवर्तनको रूपान्तरणमा योगदान पुगेको छ ।'