मकवानपुर — मकवानपुर प्रहरीले अवैध रूपमा सञ्चालन हुँदै आएको घरेलु मदिरा उत्पादन गर्ने उद्योगमा छापा मारेर ठूलो परिमाणमा मदिरा तथा कच्चा पदार्थ बरामद गरेको छ।

आइतबार दिउँसो ४ बजे हेटौंडा उपमहानगरपालिका–१ चौकिटोलस्थित जगतबहादुर घिसिङको जस्ताले बनेको घरमा अवैध रूपमा मदिरा उत्पादन भइरहेको भन्ने विशेष सूचनाका आधारमा प्रहरी टोली खटिएको थियो।

प्रहरीले उक्त स्थानमा खानतलासी गर्दा करिब ४ हजार लिटर तयारी घरेलु मदिरा तथा ५ हजार लिटर मदिरा बनाउन प्रयोग हुने कच्चा पदार्थ बरामद गरेको मकवानपुरका नायब उपरीक्षक पुष्कर बोगटीले जानकारी दिए । मदिरा उत्पादनमा प्रयोग हुने ८ वटा ग्यास सिलिन्डर, २ वटा भट्टे चुलो, २ बोरा चामल तथा प्लास्टिकका ड्रम र बोतलहरू समेत नियन्त्रणमा लिइएको उनले बताए ।