काभ्रे — काभ्रेपलाञ्चोकको बनेपा क्षेत्रमा सञ्चालित शैक्षिक परामर्श (एजुकेशनल कन्सल्टेन्सी) संस्थाहरूको अनुगमन गरिएको छ । 

शुक्रबार जिल्ला प्रशासन कार्यालय काभ्रे र शिक्षा विकास तथा समन्वय इकाई काभ्रेको संयुक्त टोलीले गरेको अनुगमनका क्रममा अधिकांश कन्सल्टेन्सी बिनाअनुमति सञ्चालन भइरहेको पाइएको छ । शिक्षा विकास तथा समन्वय इकाई काभ्रेकी प्रमुख सबिता दंगालका अनुसार, अनुगमन टोलीले बनेपाका विभिन्न स्थानमा सञ्चालित १३ वटा एजुकेशनल कन्सल्टेन्सीको निरीक्षण गरेको थियो । त्यस क्रममा ६ वटा कन्सल्टेन्सी मात्रै कानुनी रूपमा सञ्चालनमा रहेको पाइएको छ भने २ वटा कन्सल्टेन्सीले स्वीकृति नलिई सेवा प्रदान गरिरहेको भेटिएको उनले बताइन् । उनका अनुसार, बिनाअनुमति सञ्चालन भइरहेको तर अनुगमनमा पुग्दा आएल्ट्स घर बनेपा, सुपर लाइफ एडुकेश्नल कन्सल्टेन्सी, मभेन कन्सल्टिङ ग्रुप, बज्यु इन्टरनेशनल एकेडेमी र सार्प एडुकेशन बनेपा कार्यालयमा ताला लगाएर भागेको पाइएको थियो ।