मकवानपुर — बागमती प्रदेशसभामा करिब पाँच महिनादेखि रिक्त रहेको सभामुख पदको चयन प्रक्रिया मंगलबारबाट अगाडि बढ्ने भएको छ । दिउँसो ४ बजे बस्ने हिउँदे अधिवेशनको मुख्य कार्यसूची नै नयाँ सभामुख चयन रहेको छ ।

प्रदेश सरकारको आइतबार बसेको मन्त्रिपरिषद् बैठकको सिफारिसमा प्रदेश प्रमुख दीपकप्रसाद देवकोटाले प्रदेशसभाको १७औं अधिवेशन आह्वान गरेका हुन्। 

बैठकका सम्पूर्ण तयारी पूरा भएको उपसभामुख अप्सरा चापागाईंले जानकारी दिइन् । उनका अनुसार अधिवेशनअघि दिउँसो १ बजे सर्वदलीय बैठक र २ बजे कार्यव्यवस्था परामर्श समितिको बैठक बस्नेछ । यी बैठकमार्फत अधिवेशनको एजेन्डा तय गरिने प्रदेशसभा सचिवालयले जनाएको छ ।

जेन–जी आन्दोलनका क्रममा प्रदेशसभा सचिवालय, सभाहललगायतका संरचनामा क्षति पुगेपछि लामो समयसम्म बैठक सञ्चालन हुन सकेको थिएन । 

सोही कारण अधिवेशन प्रभावित भएको थियो। मंगलबारको बैठक भने हेटौंडा–२ स्थित हेटौंडा उपमहानगरपालिकाको सभाहलमा सञ्चालन गरिनेछ । आन्दोलनबाट क्षति पुगेपछि उक्त सभाहल पुनर्निर्माण गरिएको हो । 

प्रदेशसभाको स्थायी भवन निर्माण नभएसम्म यहीँबाट बैठक सञ्चालन गर्ने सरकारको तयारी छ । जेन–जी आन्दोलनकै क्रममा तत्कालीन सभामुख भुवनकुमार पाठकले पदबाट राजीनामा दिएपछि उक्त पद रिक्त थियो ।