मकवानपुर —  

हेटौंडा उपमहानगरपालिका–१५ भोर्लेमा मुसा धपाउन गोठ नजिक बालिएको आगो अनियन्त्रित भई फैलिँदा ठूलो क्षति भएको छ । आगलागीका कारण स्थानीय सानुकाजी स्याङबोको काठ र जस्ताले बनेको गोठ पूर्ण रूपमा जलेर नष्ट भएको छ।

जिल्ला प्रहरी कार्यालय मकवानपुरका अनुसार चैत १९ गते बिहीबार साँझ करिब १९:१५ बजे भएको उक्त आगलागीमा १ वटा गाईको बाछी जलेर घाइते भएको छ भने १० वटा बाख्रा जलेर मरेका छन् । आगलागीबाट करिब १ लाख ५० हजार रुपैयाँ बराबरको क्षति भएको प्रारम्भिक अनुमान गरिएको छ ।

घटनाको जानकारी प्राप्त हुनासाथ प्रहरी चौकी रातोमाटेबाट प्रहरी सहायक निरीक्षक गौरीशंकर साहको कमाण्डमा प्रहरी टोली तत्काल घटनास्थल पुगेको थियो । दमकल तथा स्थानीय बासिन्दाको सहयोगमा आगो करिब १९:४० बजे पूर्ण रूपमा नियन्त्रणमा लिइएको थियो ।