शनिबार दिउँसो १ बजेतिर सडकमाथिबाट पहिरो खस्दा कान्ति लोकपथ अवरुद्ध भएको हो ।
हेटौंडा — मकवानपुरको भीमफेदी गाउँपालिका-८ भर्याङडाँडामा पहिरो खसेर कान्ति लोकपथ अवरुद्ध भएको छ ।
शनिबार दिउँसो १ बजेतिर सडकमाथिबाट पहिरो खस्दा कान्ति लोकपथ अवरुद्ध भएको हो । पानी परिरहेको र पहिरो खस्ने क्रम नरोकिएकाले तत्काल यातायात संचालनमा आउन सक्ने अवस्था नरहेको ईलाका प्रहरी कार्यालय ठिंगनका प्रहरी सहायक निरीक्षक ज्ञानबहादुर राईले बताए । पहिरो पन्छाउनका लागि समन्वय भइरहेको उनले बताए ।
पहिरोले हेटौंडाबाट काठमाडौंतर्फ गइरहेका सवारीसाधन ठिंगनमा र काठमाडौंबाट हेटौंडातर्फ आइरहेका सवारीसाधनहरु बागमती पुलनजिक रोकिएका छन् ।
कान्ति लोकपथ ठिंगनदेखि बागमती पुल खण्डमा पर्ने करिब ७ किलोमिटर सडकमा वर्षा हुने बितिक्कै पहिरो जाने गरेको छ ।
