त्रिशूली — नुवाकोटको शिवपुरी गाउँपालिका–३ गौजेनीमा सडक विस्तारका क्रममा खसेको पहिरोमा पुरिएर हराइरहेका एक्स्काभेटर चालकको शव बुधबार साँझ निकालिएको छ । योसँगै पहिरोमा पुरिएर मृत्यु हुनेको संख्या दुई पुगेको जिल्ला प्रहरी कार्यालयका प्रहरी नायब उपरीक्षक विक्रम लामाले जानकारी दिए । उनका अनुसार गौजेनीस्थित मैदानबाट लप्सेतर्फ जाने स्थानीय सडक विस्तारका क्रममा दिउँसो २ बजेतिर माथिबाट खसेको ठूलो ढुंगासहितको पहिरोमा पुरिएर स्थानीय फूलमान तामाङ र एक्स्काभेटर चालक अमृत तामाङको मृत्यु भएको हो ।

सडक निर्माणअन्तर्गत उपभोक्ता समितिका कोषाध्यक्षसमेत रहेका ३५ वर्षीय फूलमानलाई घटनालगत्तै पहिरोबाट मृत अवस्थामा निकालिएको थियो । पहिरोमा परेर एक्स्काभेटरसहित बेपत्ता भएका चालक २४ वर्षीय अमृतको शव नेपाली सेनासहितको सुरक्षा निकायले पाँच घण्टापछि निकालेको हो ।