नुवाकोट — गृहमन्त्री ओमप्रकाश अर्यालले प्रतिनिधिसभा सदस्यको निर्वाचन स्वच्छ, निष्पक्ष र धाँधलीरहित ढंगमा तोकिएकै मितिमा देशैभर सम्पन्न हुने बताएका छन् ।  

आगामी फागुन २१ गतेका लागि तोकिएको निर्वाचन तयारीसम्बन्धी नुवाकोट र धादिङ जिल्लाको स्थलगत निरीक्षणको क्रममा शनिबार मुख्य निर्वाचन अधिकृतको कार्यालयहरू पुगी उनले उक्त धारणा राखेका हुन् । उनले भने, 'चुनाव स्वच्छ, निष्पक्ष र धाँधलीरहित ढंगमा गराउन हामी पूर्णरूपमा प्रतिबद्ध छौं र त्यो कुरा तपाईँहरूले हाम्रो आचरण र व्यवहारबाट पनि महसुस गरिसक्नु भएको छ र गर्दै पनि जानु हुनेछ ।' उनले चुनावमा अहिले चलिरहेको मिथ्या र भ्रामक सूचनाहरूबाट सचेत भई आ-आफ्नो निर्वाचन तयारीमा लाग्न सम्बद्ध सबै पक्षसँग आग्रहसमेत गरे ।  

नुवाकोटका मुख्य निर्वाचन अधिकृत कोमलप्रसाद आचार्यले प्रस्तुत गरेको निर्वाचन तयारीबारेको प्रस्तुतीकरण हेरिसकेपछि गृहमन्त्री अर्यालले आसन्न प्रतिनिधिसभा निर्वाचनका लागि भरपर्दो सुरक्षा व्यवस्था मिलाएर जिल्लामा निर्वाचन स्वच्छ, निष्पक्ष र भयरहित वातावरणमा सम्पन्न गर्न सम्बन्धित अधिकारीलाई निर्देशन दिएका निरीक्षण टोलीमा रहेका गृह मन्त्रालयका प्रवक्ता तथा सुरक्षा तथा समन्वय महाशाखा प्रमुख आनन्द काफ्लेले जानकारी दिए ।  

निरीक्षणका क्रममा मुख्य निर्वाचन अधिकृत कोमलप्रसाद आचार्यले कार्यालयले हालसम्म गरेका तयारीबारे टोलीलाई जानकारी गराएका थिए । बैठकमा जिल्लाको दुईवटै निर्वाचन क्षेत्रका जिल्ला निर्वाचन अधिकृतहरू, जिल्लास्थित सबै सुरक्षा निकायका अधिकारीहरूको पनि उपस्थिति रहेको थियो ।