काभ्रे — फागुन २१ गते हुने प्रतिनिधिसभा सदस्य निर्वाचनका लागि निर्वाचन आयोगले जारी गरेको आचारसंहिता पालना गर्न जिल्लास्थित राजनीतिक दल तथा उम्मेदवारहरुले प्रतिवद्धता जनाएका छन् ।

मुख्य निर्वाचन अधिकृतको कार्यालय धुलिखेलमा शनिबार आयोजित सर्वपक्षीय छलफलमा उनीहरुले आचारसंहिता पालना गरे नगरेको प्रभावकारी अनुगमन गर्न पनि आग्रह गरे ।

छलफलमा मुख्य निर्वाचन अधिकृत प्रेमप्रसाद न्यौपानेले निर्वाचन आचारसंहिता र त्यसको उल्लंघन गरेमा हुने कानुनी कार्बाहीबारे जानकारी गराउँदै पूर्णरुपमा आचारसंहिता पालना गर्न राजनीतिक दल, उम्मेदवारहरु, सञ्चारमाध्यमसहित सबै सरोकारवालालाई आग्रह गरे ।

स्वच्छ र निष्पक्ष निर्वाचनका लागि आचारसंहिताको पालना महत्वपूर्ण रहनेमा न्यौपानेले जोड दिए । प्रमुख जिल्ला अधिकारी गोपालकुमार अधिकारीले आचारसंहिता स्वच्छ निर्वाचनको मेरुदण्ड भएकाले पूर्णरुपमा पालना गर्न सबैलाई आग्रह गरे ।

काभ्रे क्षेत्र नम्बर १ का निर्वाचन अधिकृत टिकाभुषण घिमिरेले तोकिएको समयमा मात्रै प्रचारप्रसार गर्न राजनीतिक दल तथा सञ्चारमाध्यमहरुलाई आग्रह गरे । पछिल्लो समय एआईको दुरुपयोग गर्दै भ्रामक प्रचार हुनसक्ने सम्भावना रहेको बताउँदै उनले त्यसमा सचेत रहन आग्रह गरे ।

छलफल कार्यक्रममा कांग्रेस काभ्रेका उपसभापति रमेशप्रसाद हुमागाईंले निर्वाचन आयोगले जारी गरेको आचारसंहिता पालनामा प्रतिबद्ध रहेको बताए । उनले चुनावी प्रचार तालिका बनाउँदा दलहरुबीच समन्वय गरेर बनाउन सके चुनावी प्रचारको क्रममा हुने सम्भावित झडप र मुठभेड रोक्न सकिने बताए । यस्तै एमालेका नवराज ढकालले सामाजिक सञ्जालहरुको निगरानी र अनुगमन बढाउनुपर्नेमा जोड दिए । निर्वाचन आचारसंहिताको कार्यान्वयन जति प्रभावकारी बनाउन सकियो त्यति नै स्वच्छ र निष्पक्ष निर्वाचन हुने उनको भनाई थियो ।