हेटौंडा — बारा जीतपुर सिमरा नगरपालिका-१६ पिलुवाकी ९२ वर्षीया टिकाकुमारी न्यौपाने र मकवानपुर राक्सिराङ गाउँपालिका-९ डन्डाटारकी ८० वर्षीया पातालीमाया चेपाङ चार वर्षपछि दृष्टि फर्कँदा दंग छन्।

दृष्टि गुमेर चार वर्षदेखि अन्धकारमा बसेका टिकाकुमारी र पातालीमायाको मोतियाबिन्दुको शल्यक्रियापछि ज्योति फिर्ता आएको हो।

मकवानपुर हाडीखोला माइती घरभएकी टिकाकुमारी साहाराविनै भित्रबाहिर गर्न सक्ने भएपछि खुसी छिन् । आँखा देख्न थालेपछि घर वरिपरिको खोरियामा काम गर्न सक्ने भएको पातालीमायाले अस्पतालमा सबैको सामु सुनाइन् । ‘आँखा देख्न पाउँदा मलाई उत्साह र जाँगर बढेको छ । छोराबुहारी नातिनातिनासँगै संसार देख्न पाउनु भनेको ठूलो कुरा रहेछ,’ टिकाकुमारीले भनिन् । हेटौंडा सामुदायिक आँखा अस्पतालका डा. सुनिल थकालीले आँखाको पट्टी खोल्ने बितिक्कै आफु सामुन्ने रहेको कान्छा छोरालाई देखिन् । एक्कासी ‘छोरा आँखा देख्ने भए’ भनेर खुसी हुँदै ठूलो स्वरमा कराइन् । उनका आँखाको पट्टी खोल्दा छोराछोरी र बुहारीहरु वरिपरि थिए ।

चार वर्षदेखि टिकाकुमारी र पातालीमायाले दृष्टिविहीन जिन्दगी गुजारिन् । दिनरात नै अन्धकार भएर बस्नु पर्दा सधै यस्तो होइन्छ की जस्तो लागेको थियो दुवै जनालाई । आँखाको पट्टी खोलेपछि दुवै जनाले  हास्दै भने,‘भगवानरुपी डाक्टले आँखा देखाइदिए, अब यताउता हिँड्न र खेतबारीको काम गर्न पनि समस्या हुँदैन होला ।’