सिन्धुपाल्चोक — जिल्लाको मेलम्ची नगरपालिका ७ दुवाचौरमा आयोजित जिल्ला अन्तरपालिका स्तरीय खुला भलिबल प्रतियोगिता २०८२ को उपाधि जुगल गाउँपालिका ‘बी’ ले उचालेको छ।

मेलम्ची नगरपालिकाको आर्थिक सहयोग तथा योङ स्टार युवा क्लबको आयोजनामा भएको प्रतियोगिताको बिहीबार अबेर सम्पन्न फाइनल खेलमा जुगल ‘बी’ ले आयोजक योङ स्टार युवा क्लबलाई ५–२को सेटमा पराजित गर्दै उपाधि हात पारेको हो। रोमाञ्चक बनेको खेलमा जुगल ‘बी’ ले उत्कृष्ट प्रदर्शन गरेको थियो।

तेस्रो स्थानका लागि भएको खेलमा सेलेले हेलम्बु गाउँपालिकालाई पराजित गर्दै तेस्रो स्थान हासिल गरेको छ भने हेलम्बु गाउँपालिका सान्त्वना स्थानमा सीमित भएको छ।

चार दिनसम्म सञ्चालन भएको प्रतियोगितामा विजेता जुगल ‘बी’ ले नगद १ लाख रुपैयाँ प्राप्त गरेको छ। त्यस्तै दोस्रो, तेस्रो र सान्त्वना स्थान हासिल गर्ने टिमले क्रमशः ५० हजार, ३० हजार र १५ हजार रुपैयाँसहित शिल्ड, मेडल र प्रमाणपत्र पाएका छन्।