निवार्चनका लागि काभ्रेमा २ हजार २ सय ६९ जना निवार्चन प्रहरी माग भएकोमा २४ सय ९३ जनाले आवेदन दिएका छन्।
What you should know
काभ्रे — फागुन २१ गते हुने प्रतिनिधिसभा सदस्य निवार्चनका लागि काभ्रेमा निर्वाचन प्रहरी छनोट अर्न्तगत बिहीबार धुलिखेलमा निर्वाचन प्रहरीको लिखित परीक्षा र अन्तर्वार्ता सम्पन्न भएको छ।
निवार्चनका लागि काभ्रेमा २ हजार २ सय ६९ जना निवार्चन प्रहरी माग भएकोमा २४ सय ९३ जनाले आवेदन दिएका छन्। बिहीबार सम्पन्न भएको परीक्षामा २ हजार २ सय ८३ जना सहभागी भएको जिल्ला प्रहरीका सूचना अधिकारी डीएसपी रविन विष्टले जानकारी दिए । उनका अनुसार लिखित परीक्षा र अन्तर्वार्ताको नतिजा माघ १२ गते प्रकाशन गरिनेछ।
निर्वाचनको समयमा जिल्लामा सुरक्षा व्यवस्था कडा पारिने उनले बताए । उनका अनुसार निवार्चनका लागि जिल्लामा रहेका १८९ मतदानस्थलमध्ये २३ वटा अति संवेदनशील र ६५ संवेदनशील र १०१ मतदानस्थल सामान्य रहेका छन् ।
निर्वाचनका लागि नेपाल प्रहरी र मातहत रहने निर्वाचन प्रहरी, सशस्त्र प्रहरी र नेपाली सेना खटिने उनले बताए। उनका अनुसार २४ सैं घण्टा मतदानस्थल र मतदान केन्द्रको निर्वाचनका लागि गस्ती हुनेछ भने निर्वाचन प्रहरी विशेष गरी मतदानस्थल र केन्द्रमा खटिनेछन् । जिल्लामा खटिने २ हजार २ सय ६९ जना निर्वाचन प्रहरीमध्ये नेपाल प्रहरीबाट ११ सय १५ र सशस्त्र प्रहरीबाट ३ सय ५० जना परिचालित हुनेछन् ।
जिल्लाका २ निर्वाचन क्षेत्रमा १ सय ८९ मतदानस्थल र ४ सय मतदान केन्द्र छन् । मतदानका बेला २४ सय कर्मचारी र १२ सय जना स्वंवयसेवक खटिने भएका छन् । प्रत्येक मतदान केन्द्रमा एक मतदान अधिकृत, एक सहायक निर्वाचन अधिकृत, ३ जना सहायक निर्वाचन अधिकारी र १ जना सहयोगी रहनेछन् भने ३ जना स्वयंसेवक स्थानीय स्तरमा मतदान अधिकृतले नियुक्ति गर्नेछन् ।
यस पटकको निवार्चनमा पनि शिक्षकहरु खटिने छैनन् । ५ सय भन्दा धेरै मतदाता भएको केन्द्रमा ३ जना स्वयंसेवक र कम भएका केन्द्रमा २ जना स्वयंसेवक नियुक्ति गर्ने मापदण्ड कायम गरिएको छ ।
जिल्ला निर्वाचन अधिकृत दिनेश शिवाकोटीले जिल्लाका २ निर्वाचन क्षेत्रमा ३ लाख २६ हजार ६ सय ११ मतदातामध्ये १ लाख ६७ हजार ४ सय ९९ जना पुरुष र ५९ हजार १ सय १० महिला र २ जना अन्य रहेको जानकारी दिए । उनका अनुसार क्षेत्र नम्बर १ मा १ लाख ६१ हजार १ सय र क्षेत्र नम्बर २ मा १ लाख ६५ हजार ५ सय ११ मतदाता कायम छन् ।
