चितवन — जिल्लास्थित पत्रकार अजय गार्खालीको मृत्यु रहस्यमय देखिएको जनाउँदैं पत्रकार महासंघ जिल्ला शाखाले गठन गरेको छानबिन समितिले आइतबार प्रमुख जिल्ला अधिकारी र प्रहरी प्रमुखलाई अध्ययन प्रतिवेदन बुझाएको छ ।

उपाध्यक्ष शान्ता अधिकारीको संयोजकत्वमा शाखाले समिति गठन गरेको थियो । गोर्खालीको गत मंसिर २० गते भरतपुर अस्पतालमा मृत्यु भएको थियो । भरतपुरमा डेरामा बस्दै आएका उनी मंसिर १९ गते गैंडाकोटस्थित घरमा पुगेर फर्किएका थिए । परिवारले मंसिर २१ गते मात्र उनको निधनबारे जानकारी पाएको थियो । छोराको खोजी गर्दै वडा प्रहरी कार्यालय नारायणगढ पुगेका बाबु गोपाल परियारले सोधखोज गरेपछि मात्र मृत्युबारे खुलेको थियो ।

नारायणगढका विभिन्न गल्लीमा भौतारिरहेका अजयलाई सुरुमा वडा प्रहरी पुर्‍याइएको थियो । शरीर र टाउकामा चोट देखिएपछि प्रहरीले उपचारका लागि अस्पताल पुर्‍याएको थियो । गोर्खालीले विभिन्न ठाउँमा टाउको ठोकेकाले चोट लागेको प्रहरीले जनाएको छ । अध्ययन टोलीले पोष्टमार्टम प्रतिवेदनमा टाउकोमा बोधो कस्तुको चोट देखिएको जनाएको छ । दिमागको भित्रि भागमा रगत जमेको र बोधो बस्तुको चोटले निधन भएको प्रतिवेदनमा छ ।