भौतिक, खानेपानी, पर्यटन र स्वास्थ्य क्षेत्रका ३२ वटा आयोजनालाई गौरवको रूपमा अघि बढाउने निर्णय भएको छ र बजेट व्यवस्थापन क्षमता अनुसार तय हुनेछ।
What you should know
हेटौंडा — बागमती प्रदेश सरकारले ३२ वटा योजनालाई गौरवको आयोजनाका रूपमा छनोट गरी कार्यान्वयन गर्ने निर्णय गरेको छ । प्रदेश सरकारको बुधबार साँझ बसेको मन्त्रिपरिषद् बैठकले विभिन्न मन्त्रालयहरूले प्रस्ताव गरेका प्रदेश गौरवका आयोजना तथा बहुवर्षीय आयोजनाहरूलाई पारित गरेको हो ।
सरकारका प्रवक्ता एवम् आर्थिक मामिला तथा योजना मन्त्री प्रभात तामाङका अनुसार सरकारले प्रदेशमा ३२ वटा आयोजनाहरूलाई गौरवको आयोजनाका रूपमा अघि बढाउनेछ । गौरवका आयोजना अन्तर्गत भौतिक पूर्वाधार मन्त्रालयका १७ वटा, खानेपानी तथा सरसफाइ मन्त्रालयका ९ वटा, पर्यटन मन्त्रालयका ३ वटा र स्वास्थ्य मन्त्रालयका ३ वटा आयोजनाहरू रहेका छन् । सो आयोजनाहरूको हाल शीर्षक मात्र स्वीकृत गरिएको र बजेटको हकमा आर्थिक मामिला मन्त्रालयले वित्तीय व्यवस्थापनको क्षमता हेरेर तय गर्ने बताए ।
बैठकले बहुवर्षीय आयोजनाहरूको हकमा नामसहितको प्रस्ताव पारित गरी बजेट सिलिङका लागि अर्थ मन्त्रालयको सहमतिअनुसार अघि बढाउने निर्णय गरेको प्रवक्ता तामाङले जानकारी दिए । बैठकले केही समयदेखि रोकिएको स्वकीय सचिवहरूको तलबका विषयमा पनि छलफल गरी प्रदेश ऐनले तोकेको बमोजिम प्रक्रिया अगाडि बढाउने निर्णय गरेको छ ।
प्रदेश निजामती सेवा नियमावलीको मस्यौदा तयार गरी परामर्शका लागि लोकसेवा आयोगमा पठाउने निर्णय गरेको छ । निजामती सेवा ऐनले निर्दिष्ट गरेबमोजिमका विषयमा थप स्पष्ट पार्न र ऐनले नसमेटेका विषयहरूलाई तोकिएको ढाँचामा प्रस्तुत गर्न नियमावली तयारी गरिएको हो । सो नियमावलीको मस्यौदालाई प्रभावकारी र व्यवहारिक बनाउन आयोगको परामर्श लिने गरी पठाउने निर्णय गरिएको उहाँले जानकारी दिनुभयो ।
त्यस्तै बैठकले सामाजिक विकास मन्त्रालयको प्रस्तावमा ‘विज्ञान प्रविधि नवप्रवर्तन तथा विकास कोष नियमावली २०८२’ लाई पनि मन्त्रिपरिषद्ले स्वीकृत गरेको छ भने कृषि तथा पशुपन्छी विकास मन्त्रालयको प्रस्तावमा ‘प्रादेशिक कृषि थोक बजार सञ्चालन निर्देशिका २०८२’ को मस्यौदा स्वीकृत गरेको छ ।
