चितवन — भरतपुर महानगरपालिकाले विभिन्न योजना लागु गरे पनि तिनका लागि विनियोजित बजेट खर्च गर्न सकेको छैन।

महानगरले पछिल्लो पाँच महिनामा जम्मा २० प्रतिशत बजेट गरेको छ। महानगरपालिकाले चालु आर्थिक वर्ष ०८२/८३ का लागि अनुमानित ५ अर्ब १९ करोड ७१ लाख ६६ हजार बजेट पेश भएको थियो । 

जसमध्ये चालुतर्फ २ अर्ब ६१ करोड ७८ लाख १८ हजार र पूँजीगततर्फ २ अर्ब ५७ करोड ८८ लाख ९७ हजार रुपैयाँ बिनियोजन गरेको छ। पुस पहिलो सातासम्म महानगरले समग्र बजेटको २० प्रतिशत मात्र खर्च भएको जनाएको छ।

महानगरपालिकाको गत पुस ८ गते भएको १८ औं नगरसभामा उपमेयर चित्रसेन अधिकारीले चालु तर्फ २९ प्रतिशत र पूँजिगततर्फ ११ प्रतिशत बजेट खर्च गरिएको जनाए । उनका अनुसार समग्रमा २० प्रतिशत बजेट खर्च भएको हो। पूँजीगततर्फ २८ करोड ५१ लाख ३१ हजार रुपैयाँ खर्च भएको हो । यस अन्तर्गत विकास निर्माण कार्यमा हुने खर्च रहेका छन् । 

उक्त नगरसभामा मेयर रेनु दाहालले सहरी पूर्वाधार विकास तर्फ मुख्य तथा गौरवका आयोजनामा भएको प्रगति र खर्च प्रस्तुत गरेकी थिइन् । महानगरपालिकाको निर्माणाधीन प्रशासकीय भवनमा ४१ करोड रुपैयाँ खर्च गरिएको छ । भवनको भौतिक प्रगति ८५ प्रतिशत पुगेको उनले बताइन् । गौतमबुद्ध क्रिकेट रंगशालामा ३४ करोड ८० लाख खर्च गरिएको छ  । रंगशालाको ४२ प्रतिशत निर्माण कार्य सकिएको छ ।  

सघन सहरी विकास आयोजना र महानगरपालिकाबाट बजेट विनियोजन गरेर पुङ्गिोला सौन्दर्यकरणको काम भइरहेको छ । यसमा १७ करोड ४० लाख रुपैयाँ खर्च भइकेको छ । चालु वर्ष यसमा ३ करोड रुपैयाँ बिनियोजन गरिएको उनले बताइन् । 

महानगरपालिकाको महत्वपूर्ण आयोजना अन्तर्गत देवघाट धाममा विद्युतीय शवदाह गृह निर्माण पूरा भएको छ। महानगरले अन्य पूर्वाधार तर्फ रकम खर्च गर्दै आए पनि फोहर मैला व्यवस्थापनतर्फ ठोस प्रगति गर्न सकेको छैन।