त्रिशूली — नेपाल एकीकरणका क्रममा तत्कालीन राजा पृथ्वीनारायण शाह हिँडेको बाटो पछ्याउँदै पदयात्रा सुरु गरेको नेपाली सेनाको ‘एकीकरण टर्च र्‍याली’को नुवाकोटस्थित साततले दरबार, भैरवीदेवी मन्दिरमा स्वागत गरिएको छ ।

सोमबार गोरखाबाट सुरु भएको एकीकरण मार्ग–पदयात्रा काठमाडौँसम्म पैदल जाने क्रममा बिहीबार विदुर–२ स्थित पृथ्वीनारायण शाहले निर्माण गरेको ऐतिहासिक साततले दरबारमा आइपुगेको हो ।

बुधबार अपराह्न नै नुवाकोट प्रवेश गरेको पदयात्रा जिल्लाको भर्‍याङभुरुङ, सामरी, राइसिंह हुँदै शुभघाटमा बाँस बसेर आज नुवाकोट दरबार आइपुगेको हो । साततले दरबारस्थित भैरवीदेवी मन्दिर परिसरमा विदुर नगरपालिकाको नगरप्रमुख राजन श्रेष्ठसहित नगरपालिकाको जनप्रतिनिधिहरु, कर्मचारी, स्थानीयवासीको उल्लेख्य उपस्थिति थियो ।

उक्त अवसरमा नेपाली सेनाको ६ नं बाहिनी धादिङका बाहिनीपति सुवासचन्द्र थापा, नुवाकोटका प्रमुख जिल्ला अधिकारी शम्भुप्रसाद रेग्मीसहित जिल्लास्थित सुरक्षा निकाय नेपाली सेना, नेपाल प्रहरी, सशस्त्र प्रहरी बल, राष्ट्रिय अनुसन्धान कार्यालय, जिल्लास्थित विभिन्न सरकारी कार्यालयका प्रमुख एवं प्रतिनिधि एकीकरण मार्ग–पदयात्राको टोलीलाई स्वागत गरेका थिए । 

नेपाल एकीकरण पदमार्ग–पदयात्रामार्फत इतिहासको जगेर्ना, पुर्खाले पुर्‍याएको योगदानको संरक्षण र हराउँदै जीर्ण हुँदै गएका पुरातात्विक, धार्मिक तथा ऐतिहासिक संरचनाको जगेर्नामार्फत पयर्टन प्रवर्धनमा योगदान पुर्‍याउने लक्ष्य लिइएको श्री शेरगणका गणपति प्रमुख सेनानी अशोककुमार मल्लले जानकारी दिए । उनका अनुसार पुर्खाले पुर्‍याएको योगदानको सम्मान गर्दै अहिलेका युवा पिँढीमा राष्ट्रभाव उत्पन्न गराउन ‘एकीकरण मार्ग पदयात्रालाई महत्वका रुपमा लिइएको छ ।