आगामी फागुन २० गते राष्ट्रिय सभाका १९ सदस्यको पदावधि सकिन लागेको छ । रिक्त हुने पदमध्ये एक जना नेपाल सरकारको सिफारिसमा राष्ट्रपतिबाट मनोनित हुने र १८ जनाका लागि निर्वाचन हुने भएको हो । 
बागमती प्रदेश निर्वाचन अधिकारी हरिप्रसाद ढकालले राष्ट्रिय सभा सदस्य निर्वाचन अन्तर्गत बागमती प्रदेशबाट महिलातर्फ एक र अन्य क्षेत्रबाट एक गरी दुई जनाका लागि बुधबार मनोनयन दर्ता गर्ने कार्यतालिका रहेको बताए । 

आगामी फागुनमा पदावधि सकिने राष्ट्रिय सभाका सदस्य दुवै जना नवगठित नेपाली कम्युनिस्ट पार्टीका हुन् । महिला तर्फ तत्कालीन माओवादी केन्द्रकी गंगाकुमारी बेलवासे र तत्कालीन एकीकृत समाजवादीका वेदुराम भुसालको फागुन २० समयावधि सकिँदै छ । 

बागमतीका लागि हेटौंडा उपमहानगरपालिका-४ भुटनदेवी माविमा मतदानस्थल तोकेको छ । उक्त मतदानस्थलमा २ वटा केन्द्र रहने निर्वाचन अधिकृत गीता श्रेष्ठले बताइन् । प्रदेशसभा सदस्यको एक जनाको मतभार ५३ रहने छ भने स्थानीय तहका प्रमुख र उपप्रमुखको मतभार १९ रहने छ । बागमती प्रदेशसभामा कांग्रेसका ३७ सिट छन् भने स्थानीय तहमा प्रमुख तथा उपप्रमुख गरी १ सय ७ सिट छन् । यस्तै, एमालेका प्रदेशसभामा २७ र स्थानीय तहमा ६० सिट, तत्कालीन माओवादी केन्द्रको प्रदेशसभामा २१ र स्थानीय तहमा ५७, राप्रपाको प्रदेशसभामा १३ र स्थानीय तहमा १, एकीकृत समाजवादीको प्रदेशसभामा ७ र स्थानीय तहमा ९, नेमकिपाको प्रदेशसभामा ३ र स्थानीय तहमा २ तथा हाम्रो नेपाली पार्टीको प्रदेशसभामा २ र स्थानीय तहमा १ सिट रहेका छन्।