चितवन — नेकपा (एमाले) चितवन क्षेत्र नं.१ ले आसन्न प्रतिनिधिसभा निर्वाचनका लागि ६ जनाको नाम सिफारिस गरेको छ ।

आइतबार बसेको क्षेत्रीय समितिको बैठकले बागमती प्रदेशका पूर्व कृषि तथा सहकारीमन्त्री दावा दोर्जे लामासहित जिल्ला अध्यक्ष कमलराज पाठक, प्रदेश कमिटी सदस्य लक्ष्मी कोइराला पोखरेल, डा. किशोर खनाल, भरत भण्डारी र कृष्णलाल चौधरीको नाम जिल्ला कमिटीमा सिफारिस गरिएको क्षेत्रीय संयोजक प्रेमनाथ दुवाडीले जानकारी दिए । 

यसअघिको निर्वाचनमा पराजित भएका पूर्व अर्थमन्त्री एवं एमालेका प्रभावशाली नेता सुरेन्द्र पाण्डेको नाम भने क्षेत्रीय समितिले सिफारिस गरेको छैन । क्षेत्रीय संयोजक दुवाडीका अनुसार नेता पाण्डेले उम्मेदवारीका लागि निवेदन नदिएकाले जिल्ला कमिटीमा नाम नपठाइएको हो । 

नेता पाण्डेले भने आफ्नो नाम सिफारिस नभएको बारे आफूलाई जानकारी नभएको प्रतिक्रिया दिए । उनले कान्तिपुरसित टेलिफोनमा भने, ‘म अहिले नेपालगञ्जमा छु, नाम सिफारिस नभएको बारे मलाई कुनै जानकारी भएन, निवेदन दिनुपर्छ भनेर पनि कसैले भनेनन् ।’ 

क्षेत्र नं. १ ले नाम सिफारिस गरे पनि क्षेत्र नं. २ र ३ ले भने पुस २२ गते नाम सिफारिस गर्ने एमाले चितवनका सचिव प्रकाश ढुंगानाले जानकारी दिए । त्यसलगत्तै बस्ने जिल्ला कमिटीको बैठकले अन्तिम नाम प्रदेश कमिटीलाई सिफारिस गर्ने सचिव ढुंगानाले बताए । 

सचिव ढुंगानाले दुई पटक चितवन क्षेत्र नं. १ बाट निर्वाचित भएका नेता पाण्डेको नाम क्षेत्रीय समितिले सिफारिस नगरेको विषयमा जिल्ला कमिटीले थप निर्णय गर्ने बताए । नेता पाण्डेले इच्छा प्रकट गरे जिल्ला कमिटीले नाम थप गरेर प्रदेश कमिटीलाई पठाउन सकिने सचिव ढुंगानाले बताए । ‘हामीले सम्पर्क गर्दा उहाँ नेपालगञ्ज हुनुहुँदो रहेछ, उहाँसँग बसेर छलफल गर्छौं, राय बुझ्छौं,’ सचिव ढुंगानाले भने, ‘उहाँले इच्छा जाहेर गर्नुभयो भने उहाँको नाम थपेर पठाउन कुनै आपत्ति छैन ।’