सिन्धुपाल्चोक — एडभेन्चर र्‍याफ्टिङका लागि चर्चित भोटेकोसी र सुनकोसी नदी क्षेत्रको केन्द्र सुकुटेमा आधारभूत स्वास्थ्य सेवा विस्तार गरिएको छ।

जिल्लाको चौतारा साँगाचोकगढी नगरपालिका–१० स्थित सुकुटेमा शुक्रबार पूर्वसांसद माधव सापकोटा, नगरप्रमुख कृष्णप्रसाद सापकोटाले  स्वास्थ्य सेवा केन्द्रको भवन उदघाट्न गरेका हुन्।

उद्घाटनको अवसरमा आयोजना गरिएको निःशुल्क स्वास्थ्य परीक्षण शिविरमा आँखाको जाँच,  पाठेघरको मुखको क्यान्सर परीक्षण तथा ज्येष्ठ नागरिक लक्षित फिजियोथेरापी सेवा प्रदान गरिएको थियो। शिविरबाट स्थानीयसँगै पर्यटक र अरनिको राजमार्ग प्रयोगकर्ताले पनि सेवा लिएका थिए।

नगर स्वास्थ्य शाखा प्रमुख दिनेश नेपालका अनुसार स्वास्थ्य सेवा केन्द्रमा एक जना अहेब र एक जना अनमिको दरबन्दी स्वीकृत भइसकेको छ। 'यसले सुकुटे र आसपासका बस्तीमा नियमित प्राथमिक स्वास्थ्य सेवा सहज रूपमा उपलब्ध गराउनेछ,' उनले भने ।