हेटौंडा — मकवानपुर प्रहरीले भरियासँगै गाँजा व्यापारी पनि पक्राउ गरेको छ।

इलाका प्रहरी कार्यालय मकवानपुरले बुधबार साढे ५३ केजी गाँजासहित ७ जना भरिया पक्राउ गरेको थियो । पक्राउ परेकाहरुले गाँजा व्यापारीको नाम र ठेगाना बताए पछि प्रहरी रातारात गएर दुई जना गाँजा व्यापारीलाई पक्राउ गरेको हो।  

पक्राउ पर्नेमा सर्लाही कविलासी नगरपालिका—८ अगरवाको भित्री सडकमा बसिरहेको अवस्थामा सोही ठाउँका सुरजनारायण राय र सुधिरलाल महतो रहेका छन् । गाँजासहित पक्राउ परेका होमबहादुर अधिकारीको बयानका आधारमा राय र महतो पक्राउ परेको प्रहरीले जनाएको छ । 

बुधबार पक्राउ परेका सातै जना गाँजा बोक्ने भरिया मात्र थिए। सर्लाहीस्थित कविलासमा पुर्‍याएपछि प्रतिकेजी १ हजार ५ सय रुपैयाँ ज्याला पाउने प्रलोभनमा उनीहरुले गाँजा बोकेर ल्याएको बताएका छन् । प्लाष्ट्रिकले बेरेको गाँजा झोलामा राखेर लोथर नजिकबाट उनीहरु बसमा चढेका थिए। प्रहरीले बस रोकेर जाँच गर्ने क्रममा ५३ केजी ५७० ग्राम गाँजासहित ७ जनालाई पक्राउ गरेको थियो।