मकवानपुर — मकवानपुरको रातोमाटे चेकपोइन्टमा सवारी साधन जाँच गर्ने क्रममा प्रहरीले प्रतिबन्धित लागुऔषधसहित दुई जनालाई पक्राउ गरेको छ ।

सोमबार दिउँसो १ बजे हेटौंडा उपमहानगरपालिका–१५ रातोमाटेस्थित पूर्व–पश्चिम राजमार्गमा पोखराबाट जनकपुरतर्फ जाँदै गरेको ग २ ख १५६० नम्बरको यात्रुबाहक बस जाँच गर्दा बसमा सवार राक्सिराङ गाउँपालिका–१ का २० वर्षीय सुमन तामाङको झोलाबाट ६ किलो ७६० ग्राम गाँजा बरामद गरिएको जिल्ला प्रहरी कार्यालय मकवानपुरले जानकारी दिएको छ । तामाङलाई नियन्त्रणमा लिई लागुऔषध कसुरमा अनुसन्धान अघि बढाइएको प्रहरीले जनाएको छ ।

त्यसैगरी सोही दिन अपराह्न ४:२० बजे रातोमाटे चेकपोइन्टमै वीरगन्जबाट नारायणघाटतर्फ आउँदै गरेको बा.प्र. ६–००१ ज ०४५१ नम्बरको यात्रुबाहक ईभी गाडी जाँच गर्दा हेटौंडा उपमहानगरपालिका–१३ पदमपोखरीका ३३ वर्षीय रामबहादुर गोलेको साथबाट २ ग्राम १२० मिलिग्राम खैरो हेरोइनजस्तो देखिने पदार्थ फेला परेको छ ।