सिन्धुपाल्चोक — सशस्त्र जनयुद्धका क्रममा गम्भीर घाइते भएका पूर्वलडाकु हरिबहादुर दनुवारले भूकम्प गएको १० वर्षपछि सुरक्षित आवास पाएका छन् ।

पाँचपोखरी थाङपाल गाउँपालिकाको तिपेनीका दनुवारका लागि स्थानीय सहयोग र पार्टीको पहलमा दुई कोठे घर निर्माण गरिएको हो।

गाउँपालिका समिति संयोजक दिलबहादुर वाइवाका अनुसार जिन्सी सामग्रीतर्फ १ लाख ६७ हजार रुपैयाँ बराबरको सहयोग जुटेको छ भने नगदतर्फ ३ लाख १५ हजार ६ सय ९० रुपैयाँ संकलन भएको छ।

सोमबार प्रदेशसभा सदस्य युवराज दुलालले घरको उद्घाटन गर्दै दनुवारलाई घरको चाबी हस्तान्तरण गरेका थिए ।  'भूकम्प गएको लामो समयपछि घर पाएँ, शान्ति प्रक्रियामा योगदान दिएका घाइते तथा अपांग पूर्वलडाकुको जीवन सहज बनाउनु राज्य र समाज दुवैको साझा जिम्मेवारी भएकाले यसमा लाग्यौं,' प्रदेशसभा सदस्य दुलालले भने । 

जनयुद्धका क्रममा तीनपटक मृत्युको मुखबाट फर्किएका दनुवारले देशका लागि लड्दा एउटा आँखा र देब्रे हातका तीन औँला गुमाएका थिए। शान्ति प्रक्रियापछि भने उनी परिवारसहित वर्षौँसम्म असुरक्षित टहरोमा बस्न बाध्य भएका थिए। वर्षातमा चुहिने छानो र जाडोमा न्यानो नहुने अवस्थाले उनको दैनिकी कठिन बन्दै आएको थियो ।