हेटौंडा — जेन–जी आन्दोलनको क्रममा क्षेत्रीय कारागार भीमफेदीको पर्खाल फोडेर भागेकामध्ये बुधवार अपरान्हसम्म १४५ जना कैदीबन्दी अझै फरार छन्। फरार भएकामध्ये २६ जना भारतीय नागरिक छन् । भीमफेदी कारागारबाट भागेका ४४० जना कैदीबन्दीमध्ये नेपाल प्रहरी, नेपाली सेना र सशस्त्र प्रहरी बलले मकवानपुरका विभिन्न स्थानबाट २ सय ९५ जनालाई पक्राउ गरेको छ ।

१४५ जना अझै फरार छन् । कारागारको पर्खाल फोडेर ३९ जना भारतीय नागरिक फरार भएका थिए । तीमध्ये १३ जना कारागारमा आए, अझै २६ जना फरार छन् भनी जेलर सुवास पौडेलले बताए । भीमफेदी कारागारको ‘क’ र ‘ख’ ब्लकको पर्खाल भत्काएर गत भदौ २४ गते राति साढे १२ बजे ४४० जना कैदीबन्दी फरार भएका थिए । फरार भएकामध्ये २ सय ९५ जना पक्राउ परेका छन् ।

‘२६ जना भारतीय नागरिकसहित १४५ जना अझै फरार छन्’ भीमफेदी कारागारका जेलर पौडेलले भने, ‘जेल फोडेर भागेकाहरूको खोजी गरिरहेका छौं ।’ भीमफेदी कारागारका तीनवटा गेट फुटाई पश्चिमतर्फको पर्खाल भत्काएर (क) ब्लकबाट २६० र (ख) ब्लकबाट १८० गरी ४४० कैदीबन्दी फरार भएका थिए । फरार कैदीबन्दीहरूको खोजीका क्रममा सुरक्षाकर्मीहरूले विभिन्न स्थानबाट कैदीबन्दीहरूलाई नियन्त्रणमा लिई कारागारमा बुझाएको प्रमुख पौडेलले बताए ।