भक्तपुर — कांग्रेस बागमती प्रदेश कार्यसमितिको १३ औं पूर्ण बैठक एवं प्रदेशसभा संसदीय दलको संयुक्त बैठक भक्तपुरको नगरकोटमा शुक्रबारबाट सुरु भएको छ । 

बैठक उद्घाटन गर्दै कांग्रेस बागमती प्रदेशका सभापति एवं मुख्यमन्त्री इन्द्रबहादुर बानियाँले नेपाली कांग्रेस केन्द्रीय कार्यसमितिमा दुई वटा महाधिवेशन मिति सार्वजनिक भएको भन्दै एउटै महाधिवेशन मिति तोक्न आग्रह गरेका छन् । उनले कांग्रेसको क्रियाशील सदस्यको विवाद टुंग्याएर मात्रै महाधिवेशनको मिति तय गर्नुपर्ने बताए । पार्टीको केन्द्रीय बैठकमा पनि महाधिवेशनको दुईवटा तालिका सार्वजनिक गरेर विवाद सिर्जना गराइएको भन्दै उनले असन्तुष्टि जनाए । 

मुख्यमन्त्री बानियाँले सदस्यता विवाद टुंग्याएर १५ दिनभित्र महाधिवेशन मिति तोक्न केन्द्रीय कार्यसमितिलाई आग्रह गरेका छन् । कांग्रेसको महाधिवेशन मितिमा बहुमत र अल्पमतका आधारमा आएमा कांग्रेस, कांग्रेस नरहने भन्दै उनले २०५१ सालको अवस्थामा फर्कने दाबी गरे ।