सिन्धुपाल्चोक — काठमाडौँबाट करिब १४० किलोमिटर दुरीमा अवस्थित जुगल गाउँपालिकाको शिरमा रहेको जुगल हिमशृंखलाका दुई चुचुरो— जुगल ४ र जुगल ५ आरोहणका लागि अन्तर्राष्ट्रिय पर्वतारोही टोली बेसक्याम्प पुगेको छ ।

सिन्धु सुकुटे पर्यटन व्यवसायी संघका अध्यक्ष महेन्द्रसिं थापाका अनुसार पर्यटन प्रवर्द्धनका उद्देश्यले जुगल हिमशृ‌ंखलाका ११ चुचुरोमध्ये जुगल ४ र ५ आरोहण गर्न यूकेका सात पर्वतारोही शनिबार बेसक्याम्प पुगेका हुन्।

स्कटल्याण्डका विश्वप्रसिद्ध पर्वतारोही तथा लेखक लिओ हाउल्डिङको नेतृत्वमा नर्वेका हेनरिक बर्गसेन जुगल ४ आरोहणको तयारीमा छन्। त्यस्तै, यूकेका जेम्स पिटर विलियम्स पेरियरसहित पाँच सदस्यीय टोली जुगल ५ आरोहणका लागि बेसक्याम्पमा पुगेको छ। ‘शनिबार केही समूह बेसक्याम्पमा र केही हाइक्याम्पमा पुगेका छन्। आइतबार उनीहरू जुगल ४ र ५ आरोहण गर्ने तयारीमा छन्,’ अध्यक्ष थापाले भने ।

उनका अनुसार यो आरोहणले सिन्धुपाल्चोकको पर्यटनलाई अन्तर्राष्ट्रिय स्तरमा जोड्नेछ। थापाकै पहलमा आएको टोलीले क्रमशः ५,९३६ मिटर उचाइको जुगल ४ र ५,९२२ मिटर उचाइको जुगल ५ आरोहण गर्ने तयारी गरेको हो। उनले थपे, ‘नोभेम्बर ४ मा काठमाडौंमा स्वागत गरेका यी पर्वतारोही अहिले सुरक्षित रूपमा आरोहण यात्रामा छन्।’

जुगल गाउँपालिका पर्यटन समितिका अध्यक्ष मिलन तामाङका अनुसार गापाले पर्वतारोहण टोलीलाई पूर्ण सहयोग गरिरहेको छ। थापा अहिले पाँचपोखरी र जुगल क्षेत्रलाई अन्तर्राष्ट्रिय पर्यटक गन्तव्यका रूपमा प्रवर्द्धन गर्न सक्रिय छन्। यसअघि जुगलको चुचुरो ६ हजार एकसय ५१ मिटरको उचाइमा रहेको ग्ल्याजेन पिक (फुर्पा ज्यो ज्यो पिक) दुई पटक आरोहण भइसकेको छ । २३ वैशाख २०८१ मा नेपाल र कोरियाका पर्वतारोही टोलीले जुगल–१ हिमालको सफल आरोहण गरेका थिए ।

दुई वर्षअघि हिमालयन सेपहर्ड नेपालको आरोहण युनिटसँग गायिका सज्जा चौलागाईंसहित निमाग्याल्जेन शेर्पा, जाइसी स्यालिन्साजस्ता ५ जना आरोहीले जुगल हिमालको ११ मध्ये एक (५ हजार ९ सय २२ मिटर) अग्लो जुगल ५ चुचरो सफलतापूर्वक आरोहण गरेका थिए । २०७५ चैत २९ गते सगरमाथा आरोही माया गुरुङ नेतृत्वको टोलीले पहिलो पटक जुगलमा मानव पाइला टेक्दै झन्डा फहराएको थियो। त्यस्तै, कात्तिक ३ गते सगरमाथा आरोही शर्मिला लामा स्याङ्तान नेतृत्वको टोलीले पनि सफल आरोहण गरेको थियो।