हेटौंडा — महिलालाई बलात्कार गरेको ठहर गर्दै जिल्ला अदालत मकवानपुरले एक दोषीलाई ७ वर्ष कैदको फैसला सुनाएको छ । 

जिल्ला न्यायाधीश गीता श्रेष्ठको बिहीबारको इजलासले हेटौंडा उपमहानगरपालिका—१९ का ४३ वर्षीय मोदनाथ ढकाललाई हेटौंडाकी ५० वर्षीया महिलालाई बलात्कार गरेको ठहर गर्दै ७ वर्ष कैद, ३ लाख रुपैयाँ जरिवाना र पीडितलाई एक लाख रुपैयाँ क्षतिपूर्ति दिनुपर्ने आदेश गरेको हो । पीडक ढकालले २०८१ असार २५ गते घरमै गएर ती महिलालाई बलात्कार गरेका थिए । ढकाल पुर्पक्षका लागि क्षेत्रीय कारागार भीमफेदीमा थुनामा छन् । 

यसैगरी जिल्ला अदालत मकवानपुरले ब्राउन सुगर कारोबार गरेको ठहर गर्दै तीन युवकलाई जनही ६/६ वर्ष कैद गर्ने फैसला गरेको जनाएको छ । जिल्ला न्यायाधीश गीता श्रेष्ठको बुधबार बसेको इजलासले हेटौंडा—२ का ३६ वर्षीय नवराज भट्ट,मकवानपुरगढी—४ का सुवु गुरुङ र ३४ वर्षीय सुरज पाण्डेलाई ब्राउन सुगर कारोबार गरेको ठहर गर्दै उक्त सजाय तोकेको हो ।