चितवन — छठको दिन सूर्यलाई अर्घ्य दिन नारायणगढ नारायणी नदी किनारलाई सिँगारिएको छ । सोमबार अस्ताउँदो र पर्सी मंगलबार बिहान उदाउँदो सूर्यलाई अर्घ्य दिएपछि छठ समापन हुन्छ । सूर्य उपासनासँग जोडिएको छठ खास गरेर पूर्वी तराई अर्थात मिथिलाञ्चल क्षैत्रमा विशेष विधि, आस्था र उमंगका साथ मनाइन्छ ।

उक्त क्षेत्रका बासिन्दाको बसोबास बढेसँगै चितवनमा पनि छठ पूजामा अर्घ्य दिन नारायणी नदीसहित जिल्लाका अन्य खोला र ताल तलैयामा हजारौँ जुट्छन् । तराई सामुदायिक सेवा समितिले चितवनमा छठ पूजाको व्यवस्थापन गर्दै आएको छ ।

यो पटक नारायणी नदी किनारमा छठको अर्घ्य दिन पाँच सयभन्दा बढी परिवार जुट्ने समितिका वरिष्ठ सल्लाहाकार तथा पूर्व अध्यक्ष राजकुमार कानुले बताए । ६० को दशकसँगै चितवनमा छठ पूजा गर्नेहरूको जमघट बढ्दै गएको उनले बताए । अन्यसमेत गर्दा भोलि नारायणी नदी किनारमा पाँचदेखि १० हजार जना उपस्थित हुने कानुको आकलन छ ।