चितवन प्रहरीका अनुसार मोटरसाइकल दुर्घटनामा परेर मंगलबार राति चितवनको पूर्वी भेग खैरहनीमा एक युवकको मृत्यु भएको छ ।
चितवन — तिहारका तीन दिनमा चितवनमा भएका चार वटा दुई पांग्रे सवारी साधन दुर्घटनामा चार जनाकाे मृत्यु भएकाे छ ।
चितवन जिल्ला प्रहरी कार्यालयका अनुसार मोटरसाइकल दुर्घटनामा परेर मंगलबार राति चितवनको पुर्वी भेग खैरहनीमा एक युवकको मृत्यु भएको छ । खैरहनी नगरपालिका-२ भित्रि सडकमा मध्यरातमा उक्त घटना भएको थियो ।
बागमती प्रदेश ०३-००५ प४३०२ नम्बरको मोटरसाइकल आफै अनियन्त्रित भएर पल्टेको भन्ने सूचनाका आधारमा प्रहरी उद्धारका लागि पुगेको थियो । दुर्घटनामा गम्भीर घाइते भएका मोटरसाइकल चालकलाई उपचारका लागि भरतपुरको सरकारी अस्पताल पठाएकोमा चिकित्सकले राति सवा १ बजे मृत घोषणा गरेको जिल्ला प्रहरी कार्यालयका प्रवक्ता डिएसपी रविन्द्र खनालले बताए । अन्दाजी २२/२३ वर्षका युवकको नाम थर ठेेगना नै खुलेको छैन ।
खैरहनी-२ कै राजमार्गमा रोकिराखेको ग्याँस बुलेटमा ठोक्किएर आइतबार राति नै मोटरसाइकल चालकको ज्यान गएको थियो ।
सोमबार राति २ बजे भरतपुर महानगरपालिका-१० एयरपोर्टनजिक बा प्र ०६-००३ प ०६९२ नम्बरको स्कुटर आफै अनियन्त्रित भएर पल्टिँदा दुई युवाको ज्यान गएको थियो ।
