चितवन — जेन-जी प्रदर्शनका बेलामा चितवनको भरतपुर कारागार शाखाबाट निस्केका मध्ये १५६ जना अझै फर्केका छैनन् । कारागारबाट भागेका कैदी तथा थुनुवाहरूलाई सरकारले असोज २० गतेसम्म फर्कने समय दिएको थियो । यो अवधिभित्र कारागारको सम्पर्कमा आउनेलाई थप कारबाही नहुने सुविधा सरकारले दिएको थियो ।

भरतपुर कारागारका सूचना अधिकारी चेतनाथ ढुंगानाका अनुसार भरतपुर कारागारमा पुरुष ४९१ जना कैदी र २०३ जना थुनुवा रहेका थिए । त्यसैगरी महिला ४० जना कैदी र ६ जना थुनुवा थिए । मुद्दा फैसला भएर कैद सजाय पाइसकेकाहरूलाई कैदी भनिन्छ भने मुद्दा फैसला हुन बाँकी रहेकालाई पुर्पक्षका लागि कारागारमा राखिएकोले थुनुवा भनिन्छ ।

महिला–पुरुष कैदी, थुनुवा र उनीहरूमा आश्रित बालबालिका गरी भरतपुर कारागारमा रहेका सबै ७४३ जना भदौ २५ गते बिहान कारागारबाट बाहिरिएका थिए । यीमध्ये ५३८ पुरुष र ३७ महिला गरी ५७५ कैदी तथा थुनुवा भरतपुर कारागारमा फर्किएका छन् । उनीहरूमा आश्रित दुई जना बालबालिका पनि भरतपुर कारागारमा आएका छन् । त्यसैगरी भरतपुर कारागारबाट बाहिरिएका ६ जना पुरुष र दुई जना महिला कैदी तथा थुनुवा अन्य कारागारमा रहेका छन् ।