धादिङ — काठमाडौंमा भएको जेन-जी आन्दोलनका क्रममा सुरक्षाकर्मीका अगाडि उभिएर आफूमा कुनै डर नभएको र देशको चिन्ताले निद्रा समेत नपरेको बताउँदै थिए, धादिङ त्रिपुरासुन्दरी गाउँपालिका-५ थापा कटेरीका ३० वर्षीय जिरे भनिने यमबहादुर कँडेल ।

देश आफ्नो आमा भएको बताउँदै उनले सुरक्षाकर्मीलाई 'आफ्नो आमाका बारेमा सोच्नुस्' भन्दै अर्ती दिएर सम्झाउँदै गरेको भिडियो सामाजिक सञ्जालमा भाइरलसमेत भएको थियो । उनै कँडेलले आइतबार राति खुँडा प्रहार गरी आफ्नी ५५ वर्षीया आमा राममायाको हत्या गरेका छन् ।

असोज १२ गते काठमाडौंबाट दसैं मनाउन घर आएका कँडेलले गएराति (आइतबार) करिब साढे ८ बजेतिर घरैमा रहेको खुँडा प्रहार गरेर हत्या गरेको जिल्ला प्रहरी कार्यालय धादिङका प्रमुख एसपी भेषराज रिजालले बताए । 

अभियुक्त कँडेलका सानीआमाका छोरा शंकर अधिकारीका अनुसार पहिलेदेखि नै झगडालु स्वभावका उनले आइतबार पनि बुबाआमासँग सामान्य विषयमा विवाद गरिरहेका थिए ।दिउँसोदेखि नै विभिन्न बहानामा रिसाउने र झगडा गर्ने गरिरहेकाले आमा राममायाले छोरालाई 'उपचार गर्न जा' भन्दै कपडा ठिक पार्दिएपछि थप रिसाएका उनले आँगनमा रहेकी आमालाई खुँडाले प्रहार गरे ।

अधिकारीका अनुसार आमाको गर्धनमा तीनपटकसम्म प्रहार गरेर हत्या गरेपछि बाबुलाई पनि मार्ने धम्की दिएका थिए । 'उसले बुबालाई आफूले भनेको सबै मान्ने कबुलियत गराएका थिए । त्यसपछि आमालाई मारेको कुरा पनि ठिक हो भन्न लगाएर मात्रै छाडेको रहेछ,' उनले भने । घटना थाहा पाएर आएका छिमेकीहरुलाई पनि उसले लगातार तर्साएको अधिकारीले बताए ।

नजिकै रहेको चौकीदेखि सल्यानटार र जिल्ला प्रहरी कार्यालय धादिङबाट गएको प्रहरीले उनलाई राति अबेर घरभित्रबाटै नियन्त्रणमा लिएका थिए । 

अस्थिर स्वभावका थिए जिरे 

दुई दाइ र २ दिदीपछिका कान्छा सन्तान जिरेका जेठा दाजु ताइवान र माइला दाजु पोर्चुगलमा छन् । दुवै दाजुका परिवार काठमाडौंमा बस्दै आएका छन् । उनीहरूको पुर्खौली सम्पत्ति अंशवण्डा भइसकेको छ ।

दुई दाजुहरुको पारिवारिक अवस्था राम्रो भएका कारण समान अंशबण्डामा जिरेले कहिलेकाहीँ असन्तुष्टिसमेत जनाउने गरेको एक आफन्तले बताए । 

उनी ४/५ वर्षअघि मलेसिया गएर केही समय काम गरी फर्किएका थिए । स्वदेशमा नै काम गर्ने चाहना राखेपछि काठमाडौंको नयाँबजारमा रेस्टुरेन्ट चलाउन दाइहरुले आर्थिक सहयोग गरे पनि उनले लामो समय चलाउन सकेनन् । पछि उनले टिपर किनेर धादिङमा ढुंगागिटीको म थालेका थिए । त्यसमा पनि असफल भएका जिरेले टिपर बेचे र ट्रेकिङ व्यवसायमा लागे । त्यसलाई पनि निरन्तरता दिन सकेनन् । पछिल्लो केही समयदेखि भने उनले काठमाडौंमा पठाओ चलाउँदै आएका थिए ।