धादिङ — अविरल वर्षासँगै शुक्रबारदेखि निरन्तर अवरुद्ध रहेको पृथ्वी राजमार्ग अन्तर्गत धादिङ खण्ड बिहान साढे ११ बजे बाट पूर्ण सञ्चालनमा आएको छ । 

लगातार वर्षा र ठाउँ ठाउँमा झरेको पहिरोले आइतबार बिहानसम्म धादिङ खण्ड अस्त व्यस्त बनेको थियो । संघीय राजधानी काठमाडौंको लाइफ लाइनको रूपमा रहेको पृथ्वीराजमार्गमा शनिबार काठमाडौ प्रवेशका लागि आएका र बाहिरिएका सवारीसाधनलाई ठाउँ–ठाउँमा खसेको पहिरो पन्छाउँदै गन्तव्यमा पठाइएको थियो । 

शनिबार प्रहरीले राजमार्गमा यात्रा नगर्न आग्रह गरिए पनि पहिल्यै धादिङ खण्डमा प्रवेश गरिसकेका सवारीलाई भने प्रहरीले पहिरो पन्छाउँदै गन्तव्यमा पुर्‍याएका थिए । प्रमुख जिल्ला अधिकारी विजयराज सुवेदी, प्रहरी प्रमुख भेषराज रिजाल, भैरव गणका गणपति असीम श्रेष्ठ, सशस्त्र  प्रहरीबल आस्रित गुल्म धादिङ र राजमार्ग सुरक्षा बलका प्रमुख लगायत नै शनिबार दिनभर खटिएका थिए । 

काठमाडौं प्रवेशका लागि आएका करिब ७ सय सवारी साधनलाई पहिरो पन्छाएर सुरक्षाकर्मीको उक्त उद्धार टोलीले सुरक्षित पुर्‍याएका थिए । यस्तै शनिबार रातिदेखि धादिङमा वर्षा रोकिए पनि आइतबार बिहान बेनिघाट रोराङको ज्यामिरे घाटमा पहिरो खसेर सडक अवरुद्ध बनेपछि बिहान जिल्ला प्रवेश गरेका सवरी पुन: ज्यामिरेघाट खण्डमा रोकिए ।