बागमतीले बगाएर बेपत्ता भएपछि रोशनको खोजीमा नेपाल प्रहरी, सशस्त्र प्रहरी र स्थानीयले रातभर खोजी गरेका थिए ।
रौतहट — रौतहटको वृन्दावन नगरपालिका–३ विश्रामपुरका एक किशोर मंगलबार मृत फेला परेका छन् । घटस्थापनाको अवसरमा दुर्गा पूजाको कलश शोभायात्रामा सहभागी हुने क्रममा सोमबार बागमतीमा नुहाउन जाँदा बिश्रामपुरका १३ वर्षीय रोशन यादव बेपत्ता भएका थिए ।
उनको शव मंगलबार फेला परेको प्रहरीले जनाएको छ ।
बागमतीले बगाएर बेपत्ता भएपछि रोशनको खोजीमा नेपाल प्रहरी, सशस्त्र प्रहरी र स्थानीयले रातभर खोजी गरेका थिए । समनपुर पुलदेखि करिब एक किलोमिटर दक्षिणतर्फ मंगलबार राशनको शव फेला परेको इलाका प्रहरी कार्यालय गरुडाले जनाएको छ ।
मृतक रोशन जिल्ला प्रहरी कार्यालय बारामा कार्यरत प्रहरी हवल्दार गजेन्द्र यादवका छोरा हुन् । केही दिनदेखि परेको पानीले बागमतीमा पानीको सतह बढेको छ ।
