भरतपुर कारागारबाट बाहिरिएका ७४२ कैदीमध्ये ४४६ कैदी प्रशासनको सूचनापछि स्वस्फुर्त: फर्किएका छन्, बाँकीलाई कारबाहीको चेतावनी दिइएको छ।
What you should know
काठमाडौँ — चितवन-भरतपुर कारागारबाट अघिल्लो साता बाहिरिएकामध्ये ४४६ कैदी बन्दी प्रशासनको सूचना अनुसार कारागारमै फर्केका छन् । जेन-जी आन्दोलनका बेलामा काठमाडौं उपत्यकासहित देशका विभिन्न कागारगारमा पनि कैदी बन्दीहरू प्रदर्शनमा उत्रने र भाग्ने क्रम सुरु भएको थियो ।
भरतपुर कारागारमा रहेका ७४२ कैदी बन्दी सबै अघिल्लो बुधबार बिहान कारागारबाट बाहिरिएका थिए । सोही दिन नै प्रशासन कार्यालयले सूचना जारी गर्दै कैदी बन्दीहरूलाई कारागार फर्कन र यसरी फर्कनेलाई थप कुनै कारबाही नहुने जनाएको थियो । सूचना अनुसार नफर्कनेलाई पछि कानुन अनुसार कारबाही हुने सूचनामा उल्लेख थियो ।
‘सुचना जारी भएपछि हिजोसम्म ४४६ जना कैदी बन्दी फर्केका छन्’ भरतपुर कारागार कार्यालयका प्रमुख रवीन्द्र ढुंगानाले भने । स्वस्फुर्त: आउनेहरू लगभग आएको प्रशासनको आकलन छ ।
‘अब हामी अझै एक दुई दिन हेर्छौं । बाहरिएका प्राय हाम्रो निगरानीमा छन् । स्वस्फुर्त: आउन नचाहेकाहरूलाई पनि फर्काउन हाम्रो संयन्त्र परिचालन हुने छ । बरु त्यसअघि नै आए थप कारबाहीमा पर्नुपर्दैन थियो’ चितवन जिल्ला प्रहरी कार्यालयका प्रहरी उपरीक्षक (एसपी) गोविन्द पुरीले भने ।
कारागार प्रमुख ढुंगानाले बाहिरिएकामध्ये गम्भीर अपराधमा संलग्न भएको अपराध प्रमाणित भएका र अभियोग लागेका पनि फर्केको बताएका छन् । कुन–कुन अपराधका को–को फर्के भनेर विवरण लिइरहेको उनको भनाइ छ ।
गैंडा जस्तो दुर्लभ वन्यजन्तु मारेको र त्यसको अंगको कारोबार गरेका गैंडा सिकारी र तस्करहरू पनि भरतपुर कारागारमा छन् । तिमध्ये केहीलाई निकुञ्जले लामो समय लगाएर प्रहरीको केन्द्रीय अनुशन्धान ब्युरो (सिआईबी)को सहयोगमा समाएको थियो ।
कारागार प्रमुख ढुंगानाका अनुसार भरतपुर कारागारमा गैंडा मुद्दाका अपराध प्रमाणित भएर सजाय पाएका कैदी तथा मुद्दा फैसला नभइसकेका थुनुवा गरेर ४८ जना थिए । तिमध्ये ३६ जना फर्किसकेको कारागार प्रमुख ढुंगानाले बताए ।
