हेटौंडा — स्वास्थ्यका दृष्टिले २० वर्षभन्दा कम उमेरमा गर्भवती हुनु शारीरिक रुपमा अपरिपक्व मानिन्छ । २०७५ भदौदेखि लागू भएको मुलुकीसंहिताले २० वर्षभन्दा कम उमेरमा विवाह नै गर्न नपाउने व्यवस्था गरेको छ ।

स्वास्थ्यका दृष्टिले जोखिमपूर्ण र पछिल्लो कानुनले विवाहसमेत निषेध गरे पनि हेटौंडा उपमहानगरपालिका क्षेत्रभित्र करिब १३ प्रतिशत गर्भवती २० वर्षभन्दा कम उमेरका हुने गरेका छन् । यो संख्या स्वास्थ्य संस्थामा गर्भ परीक्षणका लागि आउने मध्येका हुन् । 

स्वास्थ्य संस्थासम्म पहुँच नै नभएका र पहुँच भएर पनि स्वास्थ्य संस्था नआउनेको संख्यालाई पनि खोजी गर्ने हो भने यो अनुपात अझै बढ्ने निश्चित छ । हेटौंडा उपमहानगरपालिका स्वास्थ्य शाखाका स्वास्थ्यकर्मी भोला चौलागाईका अनुसार नगर क्षेत्रका कूल गर्भवतीमध्ये २० वर्ष मुनिका करिब १३ प्रतिशत गर्भवती हुने गरेका छन् ।

गत आवमा गर्भ परीक्षण गराउने ३ हजार ३ सय २० गर्भवतीमध्ये ४ सय   २ जना २० वर्ष भन्दा कम उमेरका रहेको पाइएको छ । मुख्यतः बालविवाहका कारण कम उमेरमै गर्भवती हुने गरेका छन् ।