माडी नगरपालिका–२ मा हरिभक्त श्रेष्ठको खेतमा गैंडा मृत भेटिएपछि चितवन निकुञ्जले अनुसन्धानका लागि उनलाई नियन्त्रणमा लिएको छ।
What you should know
चितवन — करेन्ट लागेर धान खेतमा गैंडा मृत फेला परेपछि पक्राउ परेका खेतधनीलाई रिहा गर्न चितवन माडीका राजनीतिक पार्टीहरुले माग गरेका छन् ।
माडी नगरपालिका–२ भैरवपुरमा बुधबार बिहान स्थानीय हरिभक्त श्रेष्ठको धान खेतमा दुर्लभ वन्यजन्तु एकसिंगे गैंडा मृत फेला परेको थियो । गैंडा मृत भेटिएको घटनामा अनुसन्धान गर्न चितवन निकुञ्ज प्रशासनले श्रेष्ठलाई नियन्त्रणमा लिएको छ । माडीका युवाहरुले पनि श्रेष्ठलाई छाड्न माग गर्दै विरोध प्रदर्शन सुरु गरेका छन् ।
चितवन निकुञ्जका सूचना अधिकारी रहेका संरक्षण अधिकृत अविनास थापा मगरले श्रेष्ठलाई अनुसन्धान गर्न पाँच दिनको म्याद पाएको बताए । गैंडा दुर्लभ वन्यजन्तु भएका कारण कानुनले यसलाई मार्न या यसको अंगको ओसार पसार र कारोबार गर्न रोक लगाएको छ ।
धानखेतमा करेन्ट लागेर गैंडा मृत भेटिएपछि कानुन अनुसार नै खेतधनी श्रेष्ठलाई अनुसन्धानका लागि नियन्त्रणमा लिएको सूचना अधिकारी थापा मगरको भनाइ छ ।
श्रेष्ठलाई नियन्त्रणमा लिएपछि राजनीतिक दलका साथै माडीका युवा समूहहरुले पनि उनलाई बिनासर्त तत्काल रिहा गर्न माग गरेका छन् । माडीका युवाहरुको अगुवाइमा शुक्रबार माडी बसन्तपुर बजार र बरुवा बजारमा विरोध प्रदर्शन भएको छ ।
राजनैतिक दलहरुले निकालेको प्रेस विज्ञप्तिमा हरिभक्त श्रेष्ठले माडीमा नै केही गर्नुपर्दछ भन्ने मान्यताले १० औं बिघा जमिनमा धानखेति गरेको उल्ललेख छ । विज्ञप्तिमा भनिएको छ, ‘उहाँले आफ्नै खेतिवाली संरक्षण गर्न लगाएको तारबारमा अल्भिएर गैंडा मर्नु दु:खद हो । तर कृषिकर्म गरी जीवीकोपार्जन गर्ने किसानलाई हिरासतमा लिएर मुद्दा चलाउने कुराले हामीलाई गम्भीर बनाएको छ ।’
नेपाली कांग्रेस माडी नगर समितिका सभापति कमलनाथ भुषाल, एमालेका अध्यक्ष नारायणप्रसाद अधिकारी र माओवादी केन्द्रका अध्यक्ष भरतप्रसाद तिमिल्सिनाले संयुक्त विज्ञप्ति निकालेका हुन् ।
त्यसैगरी संयुक्त विज्ञप्ति निकाल्नेमा राष्ट्रिय स्वतन्त्र पार्टी माडी नगर समिति अध्यक्ष नारायणदत्त रिजाल, राष्ट्रिय प्रजातन्त्र पार्टीका विरेन्द्रबहादुर भण्डारी र नेकपा एकीकृत समाजवादीका अध्यक्ष पुरन महतो रहेका छन् ।
‘हामी सबै राजनैतिक पार्टीहरु कृषक हरिभक्त श्रेष्ठलाई बिनासर्त रिहाईका लागि जोडदार माग गर्दछौं,’ विज्ञप्तिमा उल्लेख छ । यो घटना र चितवन निकुञ्जबाट सिर्जित सबै समस्याहरु छलफलबाट समाधान गर्न निकुञ्ज, वन मन्त्रालय लगायत सबैसँग छलफल गर्न पनि दलहरुले ध्यानाकर्षण गराएका छन् ।
