रामेछाप — रामेछाप नगरपालिका–३ स्थित साघुटार बजारमा लामखुट्टेको लार्भा नष्ट गर्न ‘सफा शुक्रबार’ अभियान सुरु गरिएको छ । साउन १६ गते शुक्रबारबाट थालिएको अभियानको पहिलो दिन बजार क्षेत्रमा सरसफाइ तथा लार्भा नष्ट गर्ने कार्य गरिएको हो ।

‘हप्ताको एक दिन, एक घण्टा–हुँदैन कुनै कष्ट, लामखुट्टेको लार्भा नष्ट’ भन्ने नाराका साथ सुरु गरिएको यो अभियानमा जनप्रतिनिधि, प्रहरी, स्वास्थ्यकर्मी, टोल सुधार समितिका पदाधिकारी, आमा समूह, महिला स्वास्थ्य स्वयंसेविका, विद्यालयका शिक्षक तथा स्थानीयवासीको उत्साहजनक सहभागिता रहेको थियो ।

साघुटार स्वास्थ्य चौकीका प्रमुख युवराज सापकोटाका अनुसार अभियानअन्तर्गत पानी जम्ने सम्भावना भएका स्थानहरूबाट जमेका भाँडा, बोतल, टायर, प्लास्टिकजन्य फोहोर लगायतका वस्तुहरू हटाइएको छ । यस अभियानलाई अब हरेक हप्ता नियमित रूपमा सञ्चालन गरिने सापकोटाले बताए ।