हेटौंडा — मकवानपुर जिल्ला अदालतमा  सम्बन्धविच्छेदका मुद्दा दर्ता हुने क्रम वर्षेनी बढ्दो छ । जिल्ला अदालत मकवानपुरमा गत आवमा १ हजार ४७ सम्बन्धविच्छेदका मुद्दा दर्ता भए ।

तीमध्ये ७ सय ७३   थान मुद्दा फर्स्यौट भएका छन् । २ सय ७४ थान मुद्दा फर्स्यौट हुन बाँकी रहेको अदालतकी स्रेस्तेदार रोशी भण्डारीले बताइन् । सम्बन्धविच्छेदका लागि महिला पुरुष दुवैले मुद्दा दर्ता गराएका छन् । सम्बन्धविच्छेदका दर्ता भएकामध्ये २ सय ७  थान मुद्दा पुरुषले दर्ता गराएका छन् ।

दर्ता भएका मुद्दाको तथ्यांक अनुसार  मकवानपुर जिल्ला अदालतमा सरदरमा दैनिक ४ वटा सम्बन्धविच्छेदका मुद्दा दर्ता हुने गरेको छ । गत आवमा अदालतको कार्य दिन २६५ रहेको थियो । जिल्ला अदालत मकवानपुरमा गत आवमा ४ हजार १ सय ६३ मुद्दा दर्ता भएका थिए । 

तीमध्ये २५ दशमलव १५ प्रतिशत सम्वन्धविच्छेदका मुद्दा दर्ता भएका छन् । अघिल्लो आव ०८०/०८१ मा ३ हजार ८ सय ७१ मुद्दा दर्ता भएका थिए । तीमध्ये २१ दशमलव ४६ प्रतिशत अर्थात ८ सय ७ थान सम्बन्धविच्छेदका मुद्दा दर्ता भएको थियो ।

अदालतकी स्रेस्तेदार भण्डारीका अनुसार अघिल्लो आवको भन्दा गत आवमा सम्बन्धविच्छेदका २ सय ४० थान मुद्दा बढी दर्ता भएका छन । 

चालु आवको साउन महिनाको १३ गते गतेसम्म सम्बन्धविच्छेदका ३३ वटा मुद्दा दर्ता भइसकेको अदालतले जनाएको छ । सम्बन्धविच्छेदका लागि आएका अधिकांश महिलाहरु पति एवं घर परिवारको हिंसा सहन नसकेर अदालतको ढोका ढकढक्याउन आउने गरेका छन् । 

स्रेस्तेदार भण्डारीका  अनुसार बालविवाह पनि क्रमशः सम्बन्धविच्छेदमा परिणत हुन थालेको छ । २१/२२ वर्षका युवतीहरु २/३ वटा वच्चा लिएर सम्बन्धविच्छेदका लागि अदालतमा आउने गरेका छन् । उनीहरुको विवाह १५/१६ वर्षको उमेरमा भएको देखिन्छ । 

उनले भनिन्, ‘सम्बन्धविच्छेदका लागि अदालतमा दर्ता भएका यस्ता मुद्दा प्रसस्तै छन् ।’ किशोर/किशोरी,युवायुवतीमात्र नभइ जिल्ला अदालत मकवानपुरका ६८ वर्षीया वृद्धा ६९ वर्षको वृद्धको जोडी सम्बन्धविच्छेदका लागि गत आवमा अदालतमा मुद्दा दर्ता गराएका थिए । ६० वर्ष माथिका एक दर्जन भन्दाबढी वृद्धवृद्धाहरु सम्बन्धविच्छेदका लागि अदालतमा मुद्दा दर्ता गराएको तथ्यांक रहेको छ । 

‘मुलुकमा नयाँसंहिता कार्यान्वयनमा आएपछि सम्बन्धविच्छेदका लागि पुरुषलाई पनि सहज बनाएको छ । जसले गर्दा सम्बन्धविच्छेदको मुद्दा अदालतमा ह्वात्तै बढेको हो,’ अधिवक्ता मदन दाहालले भने, ‘अदालतमा दर्ता भएका मुद्दामध्ये २५ प्रतिशत भन्दाबढी मुद्दा सम्बन्धविच्छेदको हुने गरेको छ ।’