What you should know
चितवन — नेपाली कांग्रेसका महामन्त्री तथा सांसद गगन थापासँग साहारा चितवन बहुद्देश्यीय सहरकारी संस्थाका पीडित बचतकर्ताहरुले भेट गरेका छन् ।
बीपी स्मृति दिवस मनाउन चितवन आएका नेता थापासँग साहाराका बचतकर्ताहरुले मंगलबार साँझ नारायणगढमा उद्योग वाणिज्य संघमा भेटेर रकम फिर्ता हुने वातावरण तयार गर्नका लागि अनुरोध गरे ।
उनीहरुले संस्थापक जितेन्द्रबाबु (जिबी) राईसहित फरार प्रतिवादीलाई तत्काल समाउन पनि माग गरेका छन् । साहारा चितवन बहुउद्देश्यीय सहकारी बचत पीडित परिवारका तर्फबाट शालिकराम दुवाडी लगायतले महामन्त्री तथा सांसद थापासँग भेटेर समस्या सुनाएका हुन् ।
उनीहरुले सहकारीबाट ऋण लगेका ऋणीहरु पैसा फिर्ता गर्न तयार भए पनि कहाँ बुझाउने, कस्लाई बुझाउने भन्ने अन्योल रहेको हुँदा ऋण असुल हुन नसकेको बताए । स्थानीय बजारमा मात्रै करिब पाँच करोड रुपैयाँ यस्तो ऋण रकम रहेको दुवाडीले बताए ।
‘स्थानीय बजारमा रहेको पाँच करोड रुपैयाँ बराबरको ऋण रकम सरकारले विधि निर्माण गरे उठ्न सक्छ । त्यसैगरी अदालतसम्म पुगेका केही प्रतिवादीले जीबीबाट आफूले लगेको रकम तिर्छु भनेका छन् । रकम फिर्ता हुने वातावरण बने बचतकर्तालाई पनि फिर्ता दिन सकिन्छ,’ नेता थापासँगको वार्तामा दुवाडीले उपाए दिए । त्यसैगरी जीबी राईसहित सञ्चालकका धेरै कम्पनीका स्थीर सम्पत्ति र खाता रोक्का भएको पनि उनले बताए ।
‘फाष्ट ट्रयाकबाट मुद्दा टुङ्ग्याएमा ठूलो राहत हुने छ । अलि प्रयत्न गरेमा साहारा सहकारीका बचतकर्ताहरुले रकम फिर्ता पाउने देखिन्छ’ दुवाडीले भने । ऋणी र रकम तिर्छु भन्ने प्रतिवादीहरुलाई रकम तिर्ने विधि र ठाउँ बनाउन आनाकानी हुने गरेको उनले गुनासो पोखे । सहकारीलाई संकटग्रस्त घोषणा गर्न पनि वागमती प्रदेशको सहकारी मन्त्रालयले आनाकानी गरेको दुवाडीले बताए ।
त्यसैगरी सहकारी प्राधिकरणमा कागजपत्र र निवेदन बुझाउन जाँदा लिन आनाकानी गरेको उनले बताए । ‘किन दर्ता नगरेको भनेर सोध्दा जीबी, रवि र छवि जोडिएको हुँदा हामीले पनि माथि सोध्नु पर्छ भन्छन् । यो विषय के हो ? किन संकटग्रस्त घोषणा गरिएन? किन हाम्रो निवेदन दिइँदैन ? यस विषयमा हजुरले आवश्यक पहल गरी हामी सहकारी पीडितको समस्यालाई समाधान गर्न सहजीकरण गर्नुहोस्’ दुवाडीले अनुरोध गरे ।
पैसा सहकारीमा बसेको र पीडितहरुले औषधि उपचार पनि पाउन गाह्रो हुँदै गएको हुँदा यो विषय छिट्टै टुङ्ग्याए मात्रै पीडितप्रति न्याय हुने उनले कुरा राखेका थिए । ‘म यो विषयमा प्राधिकरणका पदाधीकारीहरुसँग कुरा राख्नेछु । बचत फिर्ता नपाएर पीडित बनेकाहरुलाई कसरी राहत हुन्छ, त्यो अनुसारको काम गर्न म पहल गर्ने छु,’ पीडित बचतकर्ताहरुको गुनासो सुनेपछि नेता थापाले भने ।
