काभ्रे — काभ्रेपलान्चोकमा ब्रेक फेल भई यात्रुवाहक बस दुर्घटना हुँदा २३ जना घाइते भएका छन्। जिल्ला प्रहरी कार्यालय काभ्रेका अनुसार शनिबार दिउँसो १२:२० बजे काभ्रेको भुम्लु गाउँपालिका–८ स्थित पौवामा यात्रुवाहक बस दुर्घटना भएको हो।

प्रहरी नायब उपरीक्षक तथा सूचना अधिकारी मीनबहादुर घलेले रामेछापको डोरखानीबाट काठमाडौँतर्फ जाँदै गरेको बा ३ ख ८४०८ नम्बरको यात्रुवाहक बस ब्रेक फेल भई दुर्घटना भएको जानकारी दिए । बसमा सवार ३२ जनामध्ये २३ जना यात्रु घाइते भएका छन्।

घाइतेहरूलाई उपचारका लागि जिल्ला स्थित धुलिखेल अस्पताल पठाइएको प्रहरीले जनाएको छ। बसका चालकलाई प्रहरीले नियन्त्रणमा लिएको छ।