काभ्रे — काभ्रेको बनेपा नगरपालिका-७ स्थित गोदामचोक नजिक गाडीले ठक्कर दिँदा स्कुटर चालकको मृत्यु भएको छ ।
बनेपा–पनौती सडक खण्डमा शनिबार १ बजेतिर बनेपातर्फ आउँदै गरेको ना ४ च ५९४५ नम्बरको योद्वा गाडीले विपरीत दिशाबाट आइरहेको बा.प्र.०२–०२३ प ६०२३ नम्बरको स्कुटरलाई दिँदा चालक ४५ वर्षीय ज्ञानध्वज तामाङको मृत्यु भएको इलाका प्रहरी कार्यालय बनेपाले जनाएको छ । तामाङ तेमाल गाउँपालिका-१ घर भई हाल बनेपा-७ बसपार्क बस्दै आएका थिए ।
प्रमुख प्रहरी नायब उपरीक्षक रामेश्वर त्वातीले दुर्घटनामा गम्भीर घाइते भएका तामाङलाई उपचारका लागि बनेपास्थित शिर मेमोरियल अस्पताल पठाइएकोमा दिउँसो २ बजे चिकित्सकले मृत घोषणा गरेका हुन् ।
गाडी चालक फरार रहेको र उनको खोजी कार्य जारी रहेको प्रहरीले जनाएको छ ।
