हेटौंडा — लागुऔषध र मादक पदार्थ सेवन गर्नेहरुले मकवानपुरमा ११ महिनायता एकाघरमा बस्ने ६ जना महिलाको हत्या गरेका छन् ।

थाहा नगरपालिका—१ कुन्छालका ३५ वर्षीय देवर विमलमान गोपालीले ५० वर्षीया भाउजु तुलमाया गोपालीको बिहीबार हत्या गरेका थिए । गर्दनमा खुकुरी प्रहार गरेर विमलमानले भाउजुको हत्या गरेका हुन् । विमलमान लागुपदार्थ सेवनकर्ता हुन् । उनलाई ३ वर्षअघि काठमाडौंको एक सुधार केन्द्रमा राखेर घर ल्याइएको थियो ।

उनी लागुपदार्थ सेवनकर्ता भएका कारण २० महिनाअघि मात्रै पत्नीले सम्बन्धविच्छेद गरेकी थिइन् । भाउजुले देवरलाई लागुऔषध र रक्सी नखान सम्झाउँदै आएकी थिइन् । सम्झाएकै कारण देवर र भाउजुको विगत एक वर्षदेखि बोलचाल थिएन । तर उनीहरु एउटै घरमा बस्थे । चुल्हो अलग थियो । आँगनमा निस्केको अवस्थामा एक्कासि विमलमानले भाउजुको गर्दनमा खुकुरी प्रहार गरेर हत्या गरेका थिए । 

थाहा नगरपालिकास्थित थाना बजारमा रहेको इलाका प्रहरी कार्यालय पालुङमा भाउजुको हत्या गर्न प्रयोग गरेको खुकुरीसहित उनी उपस्थित भएका थिए । इलाका प्रहरी कार्यालय पालुङका एक प्रहरीका अनुसार त्यतिबेला पनि उनले मदिरा सेवन गरेका थिए ।

गत चैत १२ गते हेटौंडा उपमहानगरपालिका—१ चौकीटोलमा लागुपदार्थ सेवन गर्ने २२ वर्षीय देवर राहुल दासले ३५ वर्षीया भाउजु गुडिया दासलाई घरकै कोठामा खुकुरी प्रहारी गरेर हत्या गरेका थिए । लागुऔषध सेवन गर्नका लागि पैसा नदिएको झोँकमा भाउजुको उनले हत्या गरेका थिए । राहुल चार/पाँच वर्षदेखि लागुऔषध सेवन गर्दै आएका थिए । अहिले उनी भीमफेदी कारागारमा छन् ।