हेटौंडा — हेटौंडा उपमहानगरपालिका, हेटौंडा खानेपानी व्यवस्थापन बोर्ड र संघीय सरकार खानेपानी तथा ढल व्यवस्थापन आयोजनाको सहलगानीमा हेटौंडामा साढे २० करोड लागतको खानेपानी योजना निर्माण हुने भएको छ ।

उपमहानगरको ९, ११, १४ र १५ नम्बर वडा लक्षित गर्दै सिमलटार–रातोमाटे सहलगानी खानेपानी योजना सञ्चालन हुने भएको हो । उपमहानगर, हेटौंडा खानेपानी व्यवस्थापन बोर्ड, संघीय खानेपानी तथा ढल व्यवस्थापन आयोजना र निर्माण व्यवसायीबीच शुक्रबार निर्माण कार्यको सम्झौतापत्रमा हस्ताक्षर भएको छ ।

संघीय सरकारबाट २०७९ सालमा ८२ करोड बराबरको डीपीआर तयार भए पनि नेपाल सरकारबाट विगतमा आयोजना सञ्चालनका लागि स्रोत सुनिश्चतता हुन सकेको थिएन । चालु आव २०८१/०८२ मा २५ करोड बराबरको स्रोत सुनिश्चितता भई बोलपत्र आह्वान भएको ठेक्कामा निर्माण व्यवसायीले २० करोड ५६ लाख रुपैयाँमा २ वर्षभित्र निर्माण सम्पन्न गर्ने गरी काम अघि बढाउने सम्झौता गरिएको हो । 

उपमहानगर कार्यालयमा भएको सम्झौतापत्रमा नगर प्रमुख मीनाकुमारी लामा, संघीय खानेपानी तथा ढल व्यवस्थापन आयोजनाका प्रमुख पूर्णप्रसाद उपाध्याय, हेटौंडा खानेपानी बोर्ड र निर्माण पक्ष जयमाता सुप्रिम जेभीका कृष्णहरि चौलागाईंले हस्ताक्षर गरेका छन् । सम्झौता अनुसार उपमहानगर र खानेपानी व्यवस्थापन बोर्डको ३० र संघीय सरकारको ७० प्रतिशत लगानी रहनेछ ।