काभ्रे — काभ्रेपलाञ्चोकको बेथानचोक गाउँपालिका–६ मा भएको बस दुर्घटनामा मृत्यु भएकी महिलाको सनाखत भएको छ । दुर्घटनामा बनेपा नगरपालिका–९ नयाँबस्तीकी ६५ वर्षीया कृष्णमाया तिमल्सिनाको मृत्यु भएको जिल्ला प्रहरी कार्यालय काभ्रेका सूचना अधिकारी प्रहरी नायब उपरीक्षक मिनबहादुर घलेले जानकारी दिए ।
बुधबार साँझ ५:४० बजे पनौती बसपार्कबाट मेदाम्चुतर्फ जाँदै गरेको बा ३ ख ४४३५ नम्बरको बस चिप्लिएर सडकबाट झण्डै ३५ मिटर तल खसेको हो । दुर्घटनामा घाइते हुनेहरूमा बस चालक बेथानचोक-६ का ४१ वर्षीय रामप्रसाद ढुंगाना, बनेपा-९ की ३२ वर्षीया संगीता आचार्य र उनकी १ वर्षीया छोरी सरगम तिमल्सिना छन् ।
घाइते चालकलाई शीर मेमोरियल अस्पताल, बनेपा पठाइएको उनले जनाए । संगीताको आमाछोरीलाई धुलिखेल अस्पताल रिफर गरिएको छ ।
बसमा चालक र सहचालकसहित सातजना सवार रहेको उनले सूचना अधिकारी घलेले बताए । सहचालकसहित अन्य सकुशल रहेको उनले बताए । दुर्घटनाबारे विस्तृत अनुसन्धान भइरहेको प्रहरीले जनाएको छ ।
![Bethanchowk bus accident: Identity of deceased [Update]](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2025/third-party/buss-0462025052412-1000x0.jpg&w=1001&h=0)