हेटौंडा — वर्षाले बाग्मती खोलाको डाइभर्सन बगाएर अवरुद्ध बनेको कान्तिलोकपथ एकतर्फी सञ्चालनमा आएको छ ।
आइतबार राति परेको पानीले बाग्मती खोलामा आएको बाढीले डाइभर्सनको ह्युमपाईपहरु बगाएर कान्तिलोकपथ पूर्ण रुपमा बन्द थियो ।
कान्तिलोकपथ सडकखण्डको बगुवास्थितमा निमार्णाधीन पुलबाट साना सवारी साधन (कार, जिप, स्कर्पियो र मोटरसाइकल) लाई एकतर्फी आउजाउ गर्ने व्यवस्था मिलाएको जिल्ला प्रहरी कार्यालय हेटौंडाले जनाएको छ ।
ठूला सवारी साधनलाई बाग्मती खोलामा डाइभर्सन नबनाएसम्म आवत जावतमा रोक लगाएको छ । मकवानपुरको भिमफेदी–८ र बाग्मती गाउँपालिका–२ को बाग्मती खोलामा पुल मर्मत सम्भार गरिरहेकाले डाइभर्सनबाट सवारी साधनहरु आउजाउ गरिरहेका थिए ।
यसअघि पनि बैशाख २१ गते डाइभर्सन बगाएर कान्तिलोकपथ अवरुद्ध भएको थियो ।
