काभ्रे — पनौतीमा सोमबार दिउँसो २ बजेदेखि करिब ३ घण्टा वर्षा हुँदा रोशी खोलामा बाढी आएर बीपी राजमार्ग करिब १६ घण्टा अवरुद्ध भएको छ भने पनौतीमा ठाडो खोलाले एक महिला बगाएको छ । 

जिल्ला प्रहरी काभ्रेका सूचना अधिकारी डीएसपी मीनबहादुर घलेका अनुसार पनौती–५ सुब्बा गाउँकी ३३ वर्षीया रेणुका गिरीलाई सोमबार साँझ ६ बजेतिर ठाडो खोलाले बगाएको हो । खेतमा काम गरेर घर फर्कने क्रममा ढलमलेस्थित ठाडो खोलामा उनी बगेकी थिइन् । ‘स्थानीय बासिन्दा, प्रहरी, सेना, सशस्त्र प्रहरीले उनको खोजी गरिरहेका छन्,’ घलेले भने । 

रोशीको बाढीले बीपी राजमार्गका डाइभर्सन बगाउनुका साथै सडकमा क्षति गर्दा सोमबार राति ९ बजेदेखि सवारी आवगमन अवरुद्ध भएको थियो । बाढीले रोशी गाउँपालिका–१२ स्थित माम्तीमा डाइभर्सन बगाएको हो । यस्तै वडा ९ स्थित बोक्से कुना र वडा ८ स्थित चारसयबेंसीमा बाढीले सडकमा क्षति गरेको हो । संघीय राजधानीसँग देशका पूर्वी जिल्लालाई जोड्ने राजमार्ग अवरुद्ध हुँदा हजारौं यात्रु अलपत्र परेका थिए ।