काभ्रे — असोजको दोस्रो साता आएको बाढीपहिरोले बेथानचोक गाउँपालिका–३ स्थित कुनेखर्कको खानीपानीको मुहान पुरेको थियो । खानीपानीको मुहानमा बाढी/पहिरोले क्षति पुर्‍याएको ८ महिनापछि त्यसको मर्मतसंभार गरेर अहिले खानीपानी पुर्‍याइएको हो ।

गत असोज १०, ११, १२ मा आएको अविरल वर्षाले क्षति पुर्‍याएको बेथानचोक गाउँपालिका–३ स्थित कुनेखर्क खानीपानी तथा सरसफाइ आयोजनालाई बेथानचोक गाउँपालिका र अक्सफामको आर्थिक सहयोग र समन्वय एवं शान्ति जनआदर्श सेवा केन्द्रले प्राविधिक सहयोग गरेर मर्मतसम्भार भएको हो । उक्त कार्य सम्पन्न भएसँगै बुधबार एक कार्यक्रम गरी आयोजना हस्तान्तरण गरिएको थियो । आयोजना हस्तानन्तरण गरेसँगै कुनेखर्कका ११३ घरधुरी खानीपानीबाट लाभान्वित भएको बेथानचोक गाउँपालिका–३ का वडाध्यक्ष कुबेर ढकालले बताए ।

बाढीले खानीपानीको मुहानमा क्षति गरेपछि गाउँमा खानीपानीको हाहाकार भएको स्थानीय सोमकुमारी तिमल्सिनाले बताइन् । उनका अनुसार त्यो समयमा जताततै पानीको समस्या भएको थियो । पानी खोज्न गाउँ–गाउँ चहारेको अनुभव उनले सुनाइन् । ‘पानी खोज्न धेरै ठाउँमा धाइयो,’ उनले भनिन्, ‘खोल्साको पानी उभाएर समेत खाएका थियौं ।’ अहिले बल्ल घरको धारामै पानी आएको उनले बताइन् ।

स्थानीय ज्ञानु तिमल्सिनाका अनुसार घर–गृहस्थी सम्हाल्ने यहाँका महिलालाई सधैं पानीको जोहो कसरी गर्ने भन्ने चिन्ता हुने गर्थ्यो । विपदपछिका दिनमा पानीको व्यवस्थापन गर्न निकै कठिन भएको उनले बताइन् । ‘यहाँ पहिल्यैदेखि नै पानीको समस्या थियो,’ उनले भनिन्, ‘असोजमा आएको बाढीपछि यहाँ झन् धेरै समस्या भयो, एक बिहान त पानीको जोहो गर्न नै लाग्थ्यो, भान्सामा पानी उत्तिकै चाहिने, बस्तुभाउ, सर–सफाइका लागि पानी चाहिने, पानीको व्यवस्थापन गर्न नै गाह्रो थियो ।’