काभ्रे — निर्माणाधीन अरनिको राजमार्गअन्तर्गत साँगा–धुलिखेल खण्डको ६ लेन विस्तार कार्य हालसम्म ४७ प्रतिशत भएको छ । सडक विभागको सूर्यविनायक–धुलिखेल, धुलिखेल–सिन्धुली–बर्दिबास सडक आयोजनाका अनुसार निर्माणका लागि तोकिएको अवधि सकिन ८ महिना मात्रै बाँकी छ । पहिलो खण्डको केही स्थानमा काम रोकिएको छ भने केही स्थानमा काम धमाधम भइरहेको छ ।

पहिलो खण्डको पुलबजार क्षेत्रमा ३ महिनादेखि स्थानीयले सेन्टर लाइनको विवादलाई लिएर निर्माण कार्य सञ्चालन गर्न नदिएको आयोजनाका इन्जिनियर विष्णु खनालले जानकारी दिए । उनका अनुसार निर्माणाधीन सडक खण्डको पुलबजार क्षेत्रमा सेन्टर लाइनको विषयलाई लिएर स्थानीयले अवरोध जनाएपछि करिब ३ महिनादेखि त्यहाँ विस्तारको काम रोकिएको हो । यस विषयमा नापी विभाग, स्थानीय जनप्रतिनिधि र स्थानीयबीच समन्वय गरी अवरोध हटाउन पटक–पटक छलफल गरिए पनि निष्कर्षविहीन भएको उनले बताए । उनका अनुसार अन्य स्थानमा भने अहिलेसम्म त्यस्तो अवरोध देखिएको छैन । पहिलो खण्डअर्न्तगत धुलिखेल क्षेत्रमा भने सडक कालोपत्रको काम भइरहेको छ ।

‘धुलिखेल बाँसघारीदेखि धुलिखेल चोकसम्म १ किलोमिटर सडकमा अहिले सडक कालोपत्रको काम भइरहेको छ,’ उनले भने, ‘२०८१/२०८२ को मसान्तसम्ममा सो क्षेत्रमा निर्माण कार्य सम्पन्न गर्ने तयारीमा छौं ।’ उनका अनुसार पुलबजार पारी क्षेत्रमा पनि चालु आर्थिक वर्षको मसान्तसम्ममा नै काम सक्ने तयारी भइरहेको छ । ‘पुलबजारको पुलपारीदेखि जनागालसम्म अहिले विस्तारको काम तीव्र भइहरको छ,’ उनले भने, ‘त्यहाँ पनि अबको केही दिनमै कालोपत्रको काम अघि बढाउने तयारीमा छौं ।’